سوہاوہ کی یونین کونسل نگیال کے دفتر میں چوری کی واردات، چور کمپیوٹر اور پرنٹر لے اڑے
سوہاوہ کی یونین کونسل نگیال کے آفس میں چوری کی واردات، چور سرکاری کمپیوٹر اور پرنٹر لے اڑے۔
تفصیلات کے مطابق گزشتہ روز جہلم کی تحصیل سوہاوہ میں تھانہ ڈومیلی کی حدود میں واقع یونین کونسل نگیال کے دفتر میں رات کے وقت نامعلوم چوروں نے تالے توڑ کر اندر داخل ہو کر قیمتی سامان چرا لیا۔
ذرائع کے مطابق چور دفتر میں رکھے گئے سرکاری سی پی یو، ایل سی ڈی مانیٹر اور پرنٹر چرا کر فرار ہو گئے۔ واردات کے بعد صبح دفتر پہنچنے پر عملے نے چوری کا انکشاف ہونے پر پولیس کو اطلاع دی۔
پولیس نے سیکرٹری یونین کونسل نگیال ندیم الحق ولد داؤد ساکن چھپرسیداں کی مدعیت میں نامعلوم افراد کے خلاف مقدمہ درج کر لیا۔ تھانہ ڈومیلی پولیس اور فرانزک ٹیم نے موقع پر پہنچ کر شواہد جمع کیے اور ملزمان کی تلاش شروع کر دی۔
پولیس ترجمان کے مطابق جلد ہی چوروں کو گرفتار کر کے چوری شدہ سامان برآمد کر لیا جائے گا۔ اس واقعہ کے بعد علاقہ بھر میں سرکاری دفاتر کی سیکیورٹی کے انتظامات پر بھی سوالات اٹھنے لگے ہیں۔
