سوہاوہ میں ٹرین ڈرائیور کی حاضر دماغی نے سکول کی دو بچیوں کی جان بچا لی
سوہاوہ کے قریب ایک اہم واقعے میں ٹرین ڈرائیور کی بروقت اور حاضر دماغی نے دو سکول طالبات کی جان بچا لی۔
دونوں بچیاں جن کی عمریں پانچ سے سات سال کے درمیان بتائی جا رہی ہیں، ریلوے ٹریک کراس کر رہی تھیں کہ اچانک تیز رفتار ٹرین آپہنچی۔
ڈرائیور نے فوری طور پر صورت حال کو بھانپتے ہوئے ایمرجنسی بریکس لگا دیں، جس سے ٹرین بروقت رک گئی اور ایک بڑا سانحہ ہوتے ہوتے ٹل گیا۔
اس موقع پر اسٹیشن ماسٹر نے ٹریک کے اطراف میں بسنے والے شہریوں سے اپیل کی ہے کہ وہ اپنے کم عمر بچوں کو اسکول کے اوقات میں اکیلے نہ بھیجیں اور بچوں کو ریلوے لائن کے قریب جانے سے روکیں تاکہ مستقبل میں کسی ناخوشگوار واقعے سے بچا جا سکے۔
انہوں نے مزید کہا کہ شہری ریلوے ٹریک کراس کرتے وقت سگنل پر ضرور توجہ دیں اور احتیاطی تدابیر کو ہر حال میں ملحوظ خاطر رکھیں کیونکہ ایک لمحے کی غفلت بڑے حادثے کا سبب بن سکتی ہے۔
