جہلم پریس کلب میں 10 کلوواٹ سولر سسٹم کا افتتاح کر دیا گیا

جہلم کی معروف سماجی و کاروباری شخصیت چیف ایگزیکٹو سیون سٹار چوہدری محمد منشاء اور ممتاز قانون دان چوہدری شفاقت قیوم دھمیال نے جہلم پریس کلب میں نصب کیے گئے 10 کلوواٹ سولر سسٹم کا باقاعدہ افتتاح کر دیا۔ اس موقع پر پریس کلب آمد پر معزز مہمانوں کا پرتپاک استقبال کیا گیا جبکہ صحافیوں نے پھولوں کی پتیاں نچھاور کر کے ان کا والہانہ خیرمقدم کیا۔

افتتاحی تقریب سے خطاب کرتے ہوئے چوہدری محمد منشاء نے کہا کہ جہلم پریس کلب میں سولر سسٹم کی تنصیب میں اپنا کردار ادا کرنا ان کے لیے باعثِ مسرت ہے۔ انہوں نے کہا کہ وہ گزشتہ کئی برسوں سے سماجی، فلاحی اور رفاہی سرگرمیوں میں بھرپور کردار ادا کر رہے ہیں، جبکہ ان کی پوری ٹیم، بالخصوص ان کے صاحبزادے اور ممتاز قانون دان چوہدری شفاقت قیوم دھمیال، اس مشن میں ان کے شانہ بشانہ کام کر رہے ہیں۔

انہوں نے کہا کہ ان کی ہمیشہ یہ کوشش رہی ہے کہ جہاں بھی عوام یا کسی ادارے کو مشکلات کا سامنا ہو، وہاں اپنی استطاعت کے مطابق عملی تعاون فراہم کیا جائے، کیونکہ انسانیت کی خدمت ہی ان کی اولین ترجیح ہے۔

اس موقع پر چوہدری شفاقت قیوم دھمیال نے اپنے خطاب میں کہا کہ جہلم کے صحافی ہمیشہ ذمہ دار، مثبت اور تعمیری صحافت کے علمبردار رہے ہیں، جو جہلم پریس کلب کا قابلِ فخر اعزاز ہے۔ انہوں نے کہا کہ آزاد، ذمہ دار اور باوقار صحافت کسی بھی مہذب معاشرے کی مضبوط بنیاد ہوتی ہے، اور وہ صحافی برادری کے ساتھ ہر خوشی اور مشکل کی گھڑی میں بھرپور تعاون جاری رکھیں گے۔

تقریب کے اختتام پر جہلم پریس کلب کے عہدیداران اور صحافیوں نے معزز مہمانوں کا شکریہ ادا کرتے ہوئے کہا کہ 10 کلوواٹ سولر سسٹم کی تنصیب پریس کلب کے لیے ایک قیمتی تحفہ ہے، جس سے بجلی کے اخراجات میں نمایاں کمی آئے گی اور ادارے کی کارکردگی مزید مؤثر ہوگی۔ انہوں نے امید ظاہر کی کہ اس طرح کے فلاحی اقدامات معاشرے میں خدمتِ خلق کے جذبے کو مزید فروغ دیں گے۔