امارات میں مقیم غیرملکیوں کیلئے 7 ممالک میں ویزہ فری انٹری

دبئی: کئی ممالک نے متحدہ عرب امارات کے رہائشیوں کے لیے سفری پابندیوں میں نرمی کردی جس کے تحت یو اے ای میں مقیم غیرملکی بغیر انٹری پرمٹ کے 7 ممالک کا دورہ کر سکتے ہیں یا وہاں آمد پر ویزہ حاصل کر سکتے ہیں۔

خلیج ٹائمز کے مطابق بہت سے ممالک نے یو اے ای کے رہائشیوں کے لیے سفری پابندیوں میں نرمی کی ہے جس سے وہ دنیا بھر میں چھپے ہوئے جواہرات کو تلاش کر سکتے ہیں، کیا آپ بھی اپنی اگلی چھٹیوں کے لیے کسی دوسرے ملک کا سفر بک کرنے کا سوچ رہے ہیں لیکن ویزہ کے لیے درخواست دینے کی پریشانی سے نہیں گزرنا چاہتے؟ تو درج ذیل میں ان 7 ممالک کی فہرست اور معلومات فراہم کی گئی ہیں جہاں امارات کے رہائشی، چاہے ان کے پاس کسی بھی ملک کا پاسپورٹ ہو، بغیر ویزے کے یا ویزہ آن ارائیول پر انٹری حاصل کرسکتے ہیں.

جارجیا

یہ خوبصورت ملک جو یورپ اور ایشیا کے سنگم پر واقع ہے، متحدہ عرب امارات کے مسافروں کے لیے ایک مقبول منزل ہے، جس میں پہاڑوں، بحیرہ اسود کے ساحلوں اور تاریخی قصبوں کی سیر کی جاسکتی ہے, تبلیسی اس ملک کا دارالحکومت ہے جو یو اے اے سے صرف ساڑھے تین گھنٹے کی فلائٹ کی دوری پر ہے اور یہ علاقے کے دیگر شہروں کے مقابلے میں نسبتاً زیادہ سستی تعطیلات کی منزل ہے، امارات کے رہائشیوں کو ملک میں داخل ہونے کے لیے ویزے کی ضرورت نہیں ہے اور وہ 90 دن تک بغیر انٹری پرمٹ کے یہاں رہ سکتے ہیں.

ازبکستان

وسطی ایشیائی ملک متحدہ عرب امارات کے باشندوں کو آمد پر ویزہ دیتا ہے اور انہیں یہاں بغیر ویزہ کے 30 دن تک رہنے کی اجازت ہے، ازبکستان کے مشہور شہروں میں دارالحکومت تاشقند شامل ہے، جس میں مشہور تاشقند ٹاور اور تاریخی عجائب گھر ہیں، نیز ثمرقند جو تاریخی شاہراہ ریشم پر واقع ہے اور خوبصورت مساجد اور مقبروں کا گھر ہے.

مالدیپ

جنہیں ساحل سمندر پر چھٹیاں گزارنا پسند ہے تو اس مقصد کے لیے مالدیپ ایک عالمی شہرت یافتہ سیاحتی مقام ہے جو تمام ممالک کے مسافروں کو 30 دن کا ویزہ آن ارائیول دیتا ہے، پرسکون ساحلوں اور نیلے پانیوں کے علاوہ یہ ملک اپنی مساجد، مچھلی منڈیوں اور مرجان کی چٹانوں کے لیے بھی مشہور ہے.

آذربائیجان

یہ ملک اپنے دارالحکومت باکو کے قرون وسطیٰ کی دیواروں والے اندرونی شہر کے لیے مشہور ہے، متحدہ عرب امارات کے باشندے یہاں آمد پر ویزہ حاصل کر سکتے ہیں، جو جاری ہونے کی تاریخ سے ایک ماہ کے لیے کارآمد ہوگا، تاہم اگر آپ 15 دن سے زیادہ قیام کرنے کا ارادہ رکھتے ہیں تو آپ کو اسٹیٹ مائیگریشن سروس میں رجسٹریشن حاصل کرنی ہوگی، اس ملک میں آپ کی رہائش والے ہوٹل کی انتظامیہ اس عمل میں آپ کی مدد کر سکتی ہے.

کینیا

2023ء میں کینیا نے اعلان کیا کہ دنیا بھر سے آنے والے سیاحوں کو جنوری 2024ء سے ویزہ کی ضرورت نہیں ہوگی، سیاحت کی صنعت اس افریقی ملک کی معیشت میں ایک اہم کردار ادا کرتی ہے، جو بحر ہند کے ساحل کے ساتھ ساتھ ساحل سمندر کے نظارے اور اندرون ملک وائلڈ لائف سفاری پیش کرتا ہے.

سیشیلز

بحر ہند میں جزیرہ نما ملک کی جانب سے زیادہ تر قومیتوں کے لیے ویزہ فری انٹری کی سہلوت ہے، مسافروں کو ملک میں آمد پر داخلے کا اجازت نامہ جاری کیا جاتا ہے بشرطیکہ وہ درست سفری دستاویزات اور واپسی یا اپنے آگے کے سفر کا ٹکٹ دکھا سکیں، یہ اپنے قدیم ساحلوں، مرجان کی چٹانوں اور جنگلی حیات کے لیے مشہور ہے، جس میں دیوہیکل کچھوے بھی شامل ہیں.

نیپال

ہمالیہ میں واقع یہ ملک متحدہ عرب امارات کے رہائشیوں کے لیے آمد پر ویزہ پیش کرتا ہے، دنیا کے سب سے اونچے پہاڑ ماؤنٹ ایورسٹ کا گھر ہونے کے علاوہ اس ملک میں بہت سے خوبصورت بدھ اور ہندو مندر ہیں، یہ ملک اپنے پُرسکون راستوں، مزیدار سٹریٹ فوڈ اور مہمان نوازی کے لیے بھی مشہور ہے۔