کھیوڑہ میں حسنین عباس عرف نینی موٹر سائیکل چور گینگ گرفتار، 6 موٹر سائیکل اور سپیئر پارٹس برآمد

پنڈدادنخان: کھیوڑہ پولیس چوکی کی بڑی کارروائی، حسنین عباس عرف نینی موٹر سائیکل چور گینگ گرفتار کر لیا۔

تفصیلات کے مطابق ڈی پی او جہلم طارق عزیز سندھو کی خصوصی ہدایت پر ڈی ایس پی پنڈدادنخان ملک محمد اکرم کی زیرِ نگرانی انچارج پولیس چوکی کھیوڑہ ملک نذر عباس نے جرائم پیشہ عناصر کے خلاف گھیرا تنگ کرتے ہوئے اہم کارروائی میں حسنین عباس عرف نینی موٹر سائیکل چور گینگ کو گرفتار کر لیا۔

پولیس کے مطابق گرفتار گینگ کے قبضہ سے مختلف مقامات سے چوری شدہ 6 موٹر سائیکل اور موٹر سائیکل سپیئر پارٹس برآمد کر لیے گئے۔ اس کے علاوہ منشیات فروشوں اور پیشہ ور بھکاریوں کے خلاف جاری کریک ڈاؤن میں بھی متعدد ملزمان کو حراست میں لیا گیا۔

ڈی ایس پی ملک محمد اکرم نے کہا کہ تمام گرفتار ملزمان کے خلاف ٹھوس شواہد کے ساتھ چالان عدالت کیا جائے گا تاکہ انہیں قرار واقعی سزا دلائی جا سکے۔

اس موقع پر ڈی پی او جہلم طارق عزیز سندھو نے کہا کہ “جرائم پیشہ عناصر معاشرے کا ناسور ہیں، ان کے خلاف جہلم پولیس کا بھرپور کریک ڈاؤن بلا تفریق جاری رہے گا تاکہ شہریوں کے جان و مال کا تحفظ یقینی بنایا جا سکے۔”