چوری، ڈکیتی اور موٹر سائیکل چوری کی وارداتوں میں ملوث "نینو گینگ” کا سرغنہ ساتھی سمیت گرفتار
سوہاوہ: پولیس نے جرائم پیشہ عناصر کے خلاف کارروائی کرتے ہوئے چوری، ڈکیتی اور موٹر سائیکل چوری کی متعدد وارداتوں میں ملوث "نینو گینگ” کے سرغنہ کو اس کے ساتھی سمیت گرفتار کر لیا۔ پولیس نے ملزمان کے قبضے سے 55 ہزار روپے نقدی بھی برآمد کر لی ہے۔
ترجمان جہلم پولیس کے مطابق یہ کامیاب کارروائی ایس ایچ او تھانہ سوہاوہ اور ان کی ٹیم نے خفیہ اطلاعات اور پیشہ ورانہ مہارت کو بروئے کار لاتے ہوئے انجام دی۔ گرفتار ملزمان علاقے میں چوری، ڈکیتی اور موٹر سائیکل چوری کی مختلف وارداتوں میں ملوث تھے اور کافی عرصے سے پولیس کو مطلوب تھے۔
پولیس کے مطابق ملزمان وارداتوں سے قبل خالی گھروں کی ریکی کرتے تھے اور موقع ملنے پر گھروں میں داخل ہو کر چوری اور ڈکیتی کی وارداتیں انجام دیتے تھے۔ پولیس نے کارروائی کے دوران گینگ کے سرغنہ اور اس کے ساتھی کو گرفتار کر کے ان کے قبضے سے 55 ہزار روپے نقدی برآمد کر لی۔
ترجمان کا کہنا ہے کہ گرفتار ملزمان سے مزید تفتیش جاری ہے اور ان سے دیگر وارداتوں کے بارے میں بھی معلومات حاصل کی جا رہی ہیں۔ ابتدائی تفتیش میں اہم انکشافات کی توقع کی جا رہی ہے جبکہ ملزمان کے دیگر ساتھیوں کی گرفتاری کے لیے بھی کارروائیاں جاری ہیں۔
پولیس حکام کے مطابق ملزمان کو ٹھوس شواہد اور مکمل تفتیش کے بعد چالان عدالت کیا جائے گا تاکہ انہیں قانون کے مطابق قرار واقعی سزا دلوائی جا سکے۔
ڈسٹرکٹ پولیس آفیسر جہلم شفیق احمد چوہدری نے اس موقع پر کہا کہ جرائم پیشہ عناصر کے خلاف بلاامتیاز کارروائیوں کا سلسلہ جاری رہے گا اور شہریوں کے جان و مال کے تحفظ کو ہر صورت یقینی بنایا جائے گا۔ انہوں نے کہا کہ ضلع بھر میں امن و امان کے قیام اور جرائم کے خاتمے کے لیے تمام دستیاب وسائل بروئے کار لائے جا رہے ہیں۔
ڈی پی او جہلم نے مزید کہا کہ عوام کے تعاون سے جرائم کے خلاف جاری مہم کو مزید مؤثر بنایا جا رہا ہے اور قانون شکن عناصر کے لیے ضلع جہلم میں کوئی جگہ نہیں۔ انہوں نے شہریوں سے اپیل کی کہ وہ مشکوک سرگرمیوں اور جرائم پیشہ افراد کے بارے میں فوری طور پر پولیس کو اطلاع دیں تاکہ بروقت کارروائی عمل میں لائی جا سکے۔
