پاکستان اور ہنگری کے تعلقات 60 سالہ دوستی اور تعاون کی مضبوط مثال ہیں، بلال اظہر کیانی

وزیرِ مملکت برائے ریلوے و خزانہ بلال اظہر کیانی نے پاکستان اور ہنگری کے درمیان سفارتی تعلقات کے 60 سال مکمل ہونے پر دونوں ممالک کی قیادت اور عوام کو مبارکباد پیش کی۔

ہنگری کے سفارت خانے میں اس موقع پر ایک خصوصی تقریب منعقد ہوئی، جس میں دونوں ممالک کے حکام، سفارتکاروں اور معزز مہمانوں نے شرکت کی۔ وزیرِ مملکت بلال اظہر کیانی نے شرکاء کے ہمراہ یادگاری کیک کاٹا اور تقریب سے خطاب کیا۔

اپنے خطاب میں انہوں نے کہا کہ پاکستان اور ہنگری کے درمیان معیشت، تجارت، تعلیم، توانائی، ریلوے اور ثقافت کے شعبوں میں دوطرفہ تعاون بڑھانے کے وسیع امکانات موجود ہیں۔ انہوں نے اس عزم کا اظہار کیا کہ دونوں ممالک امن، ترقی اور خوشحالی کے مشترکہ اہداف کے حصول کے لیے مل کر کام کرتے رہیں گے۔

بلال اظہر کیانی نے ہنگری کے اسٹیپینڈیم ہنگیریکم اسکالرشپ پروگرام کو بھی سراہا، جس کے تحت پاکستانی طلبہ اعلیٰ تعلیم کے مواقع حاصل کر رہے ہیں۔ انہوں نے کہا کہ پاکستان ہنگری کے تجربات سے سیکھ کر اپنے انفراسٹرکچر اور ریلوے نظام کو مزید جدید بنانے کا خواہاں ہے۔

انہوں نے اس امید کا اظہار کیا کہ آئندہ برسوں میں دونوں ممالک کے تعلقات مزید مضبوط ہوں گے اور باہمی تعاون نئی بلندیوں کو چھوئے گا۔