جہلم کے علاقے عباس پورہ میں بجلی کی لٹکتی تاریں خطرے کی گھنٹی، علاقہ مکین سراپا احتجاج

جہلم کے گنجان آباد علاقے عباس پورہ میں بجلی کی بوسیدہ اور لٹکتی ہوئی تاریں علاقہ مکینوں کے لیے مستقل پریشانی، خوف اور خطرے کا سبب بن گئی ہیں۔ مقامی افراد کا کہنا ہے کہ متعدد بار شکایات کے باوجود متعلقہ اداروں کی جانب سے کوئی خاطر خواہ کارروائی نہیں کی گئی۔

علاقہ مکینوں کے مطابق یہ تاریں بعض مقامات پر اتنی نیچی ہیں کہ گھروں کی چھتوں اور گلیوں میں روزمرہ آمد و رفت کے دوران چھو جانے کا خطرہ رہتا ہے۔ بارش یا تیز ہوا کی صورت میں صورتحال اور بھی خطرناک ہو جاتی ہے، جس سے کسی بڑے حادثے کا خدشہ بڑھ جاتا ہے۔

رہائشیوں نے بتایا کہ کئی بار واپڈا اور آئیسکو کو تحریری و زبانی شکایات کی گئی ہیں، لیکن ہر بار صرف تسلیاں دی گئیں، عملی طور پر کوئی اقدام نہیں اٹھایا گیا۔ اہلِ علاقہ کا مطالبہ ہے کہ فوری طور پر پرانی اور غیر محفوظ تاروں کو ہٹا کر جدید، انسولیٹڈ اور محفوظ تاریں لگائی جائیں۔

سماجی حلقوں اور شہری تنظیموں نے بھی اس مسئلے پر شدید تشویش کا اظہار کرتے ہوئے کہا ہے کہ اگر متعلقہ اداروں نے فوری نوٹس نہ لیا تو کسی بھی وقت قیمتی جانوں کا ضیاع ہو سکتا ہے، جس کی تمام تر ذمہ داری واپڈا اور آئیسکو پر عائد ہوگی۔

شہریوں نے اعلیٰ حکام، خصوصاً وزیرِ توانائی اور ضلعی انتظامیہ سے اپیل کی ہے کہ عباس پورہ سمیت ایسے تمام علاقوں میں بجلی کے نظام کو جدید تقاضوں کے مطابق فوری طور پر اپ گریڈ کیا جائے تاکہ انسانی جانوں کا تحفظ یقینی بنایا جا سکے۔