پنڈدادنخان مین بازار میں جاری بیوٹیفکیشن منصوبہ تاجروں اور شہریوں کے لیے عذاب بن گیا

پنڈدادنخان مین بازار میں جاری بیوٹیفکیشن پراجیکٹ ناقص منصوبہ بندی اور غیر مؤثر تعمیراتی حکمتِ عملی کے باعث شہریوں اور تاجروں کے لیے شدید پریشانی کا باعث بن گیا ہے، جبکہ حالیہ بارشوں کے بعد صورتحال مزید خراب ہو گئی ہے۔

مقامی ذرائع کے مطابق تعمیراتی کام کے دوران متبادل راستوں کا مناسب بندوبست نہ ہونے کی وجہ سے بازار آنے والے افراد کو کیچڑ، کھڑے پانی اور مختلف رکاوٹوں سے گزرنا پڑ رہا ہے، جس سے آمدورفت انتہائی دشوار ہو چکی ہے۔ کاروباری سرگرمیاں بھی بری طرح متاثر ہو رہی ہیں اور تاجروں کا کہنا ہے کہ گاہکوں کی آمد میں واضح کمی دیکھنے میں آ رہی ہے۔

شہریوں نے شکایت کی ہے کہ منصوبے پر عملدرآمد کے دوران نہ تو حفاظتی اقدامات کیے گئے اور نہ ہی عوامی سہولت کو مدنظر رکھا گیا۔ خاص طور پر خواتین، بزرگ افراد اور بچوں کو شدید مشکلات کا سامنا کرنا پڑ رہا ہے۔

سماجی حلقوں اور تاجر برادری نے اعلیٰ حکام سے فوری نوٹس لینے کا مطالبہ کرتے ہوئے کہا ہے کہ تعمیراتی کام کو بہتر منصوبہ بندی کے تحت جلد مکمل کیا جائے اور متبادل راستوں کا فوری بندوبست یقینی بنایا جائے تاکہ عوام کو مزید مشکلات سے بچایا جا سکے۔