ضلع جہلم کے ہوٹلوں میں ناقص صفائی اور مضر صحت کھانوں کی فروخت

جہلم شہر، جی ٹی روڈ اور ضلع کی چاروں تحصیلوں میں قائم متعدد ہوٹلوں پر صفائی ستھرائی کے ناقص انتظامات اور مضرِ صحت کھانوں کی فروخت کھلے عام جاری ہے۔ بیشتر ہوٹلوں کا سیوریج نظام خراب جبکہ واش رومز انتہائی گندے پائے گئے ہیں۔

شہریوں کا کہنا ہے کہ کئی ہوٹل مالکان حفظانِ صحت کے اصولوں کو یکسر نظر انداز کرتے ہوئے صرف منافع کمانے میں مصروف ہیں۔ ہوٹلوں پر کام کرنے والے ویٹرز اور کاریگر بغیر میڈیکل فٹنس سرٹیفکیٹس کے، گندے کپڑوں اور میل بھرے ناخنوں کے ساتھ کھانے تیار اور پیش کر رہے ہیں۔

علاوہ ازیں جی ٹی روڈ پر واقع کئی ہوٹلوں نے سیوریج کا گندا پانی سڑکوں پر چھوڑ رکھا ہے، جس سے تعفن پھیل رہا ہے اور شہریوں کے لیے مشکلات میں اضافہ ہو گیا ہے۔

عوام نے کمشنر راولپنڈی اور ڈپٹی کمشنر جہلم سے مطالبہ کیا ہے کہ وہ فوری نوٹس لیں اور حفظانِ صحت کے اصولوں کی خلاف ورزی کرنے والے ہوٹل مالکان کے خلاف سخت کارروائی عمل میں لائیں تاکہ شہری بیماریوں سے محفوظ رہ سکیں۔