پنڈدادنخان میں خود ساختہ مہنگائی کا طوفان، عوام مشکلات کا شکار

پنڈدادنخان میں خود ساختہ مہنگائی کا سلسلہ عروج پر پہنچ گیا، جہاں ہر دکاندار پھل اور سبزیوں کے من مانے نرخ وصول کرنے لگا۔ قصاب بھی مہنگائی کی اس لہر میں شامل ہو گئے، اور ذمہ داران کی مبینہ غفلت یا منتھلی کی وجہ سے عوام مہنگائی کی چکی میں پس رہے ہیں۔

تفصیلات کے مطابق جہلم کی تحصیل پنڈدادنخان میں انتظامیہ کی نااہلی کے باعث ریٹ لسٹ وقت پر نہ پہنچنے کی وجہ سے دکاندار اپنی مرضی کے ریٹ پر اشیاء فروخت کر رہے ہیں۔ پوری تحصیل میں ہر چیز کے مختلف نرخ مقرر ہیں جبکہ کھیوڑہ اور پنڈدادنخان میں قصاب دھڑلے سے بڑا گوشت 1000 سے 1100 روپے فی کلو فروخت کر رہے ہیں۔

مٹن اور چکن کے بھی مختلف اور غیر منصفانہ ریٹ طے کیے گئے ہیں۔ سڑک کنارے کھڑے ریڑھی بان، جو نہ صرف ٹریفک کی روانی میں خلل ڈال رہے ہیں بلکہ تجاوزات کا سبب بھی بن رہے ہیں، اپنی مرضی کے ریٹ پر اشیاء فروخت کر رہے ہیں۔

ذرائع کے مطابق تحصیل بھر میں پرائس کنٹرول کمیٹیاں کاغذی کارروائی تک محدود ہیں اور مبینہ طور پر منتھلیاں طے کر رکھی ہیں، جس کی وجہ سے عوام کو ریلیف فراہم کرنے میں ناکام ہیں۔

عوامی اور سماجی حلقوں نے کمشنر راولپنڈی اور ڈپٹی کمشنر جہلم سے فوری مداخلت کی اپیل کی ہے۔ ان کا مطالبہ ہے کہ ناجائز منافع خوروں کے خلاف عملی اقدامات کیے جائیں، عوام کو خود ساختہ مہنگائی کی چکی سے نجات دلائی جائے اور غفلت برتنے والے عملے کے خلاف محکمانہ کارروائی عمل میں لائی جائے۔