سوہاوہ: حلقے کے عوام کو درپیش مسائل کے حل کے لیے تمام وسائل بروئے کار لائیں گے، بلال اظہر کیانی
سوہاوہ: وزیرِ مملکت برائے خزانہ و ریلوے بلال اظہر کیانی نے سابق رکنِ صوبائی اسمبلی راجہ اویس خالد کی رہائش گاہ (ڈیرہ) پر لیگی کارکنان، معززینِ علاقہ اور شہریوں سے ملاقات کی، جہاں انہوں نے عوامی مسائل سنے اور ان کے فوری حل کے لیے متعلقہ حکام کو ضروری ہدایات جاری کیں۔
اس موقع پر تحصیل انتظامیہ کے افسران بھی موجود تھے۔ شہریوں نے وزیرِ مملکت کو اپنے علاقوں میں درپیش مختلف عوامی مسائل، ترقیاتی منصوبوں اور بنیادی سہولیات سے متعلق تجاویز اور شکایات سے آگاہ کیا۔
بلال اظہر کیانی نے شہریوں کے مسائل نہایت توجہ سے سنے اور متعدد شکایات موقع پر ہی متعلقہ حکام سے رابطہ کر کے حل کروائیں، جبکہ دیگر مسائل کے جلد، مؤثر اور مستقل حل کے لیے ہر ممکن اقدامات کرنے اور متعلقہ اداروں کو ضروری ہدایات جاری کرنے کی یقین دہانی کرائی۔
اس موقع پر گفتگو کرتے ہوئے وزیرِ مملکت برائے خزانہ و ریلوے بلال اظہر کیانی نے کہا کہ عوام کی خدمت، ان کے مسائل کا بروقت حل اور علاقے میں ترقیاتی عمل کو مزید تیز کرنا حکومت کی اولین ترجیحات میں شامل ہے۔ انہوں نے کہا کہ حکومت عوام کو بنیادی سہولیات کی فراہمی اور ترقیاتی منصوبوں کی بروقت تکمیل کے لیے تمام دستیاب وسائل بروئے کار لا رہی ہے۔
انہوں نے اس عزم کا اظہار کیا کہ حلقے کے عوام کو درپیش مسائل کے حل، بنیادی سہولیات کی فراہمی اور علاقے کی ترقی و خوشحالی کے لیے ہر ممکن اقدامات کیے جائیں گے اور عوامی خدمت کا یہ سلسلہ مستقبل میں بھی جاری رکھا جائے گا۔
اس موقع پر لیگی کارکنان، معززینِ علاقہ اور شہریوں نے وزیرِ مملکت بلال اظہر کیانی کا شکریہ ادا کرتے ہوئے عوامی مسائل کے حل کے لیے ان کی ذاتی دلچسپی، عوامی رابطے اور بروقت اقدامات کو سراہا۔
