پنڈدادنخان میں خواتین کے پرس چوری کرنے والی اوڈ گینگ کی دو لیڈی ملزمان گرفتار

پنڈدادنخان: پولیس نے کارروائی کرتے ہوئے خواتین کے پرس چوری کرنے والی اوڈ گینگ کی دو لیڈی ملزمان کو گرفتار کر لیا جبکہ ان کے قبضے سے نقدی بھی برآمد کر لی گئی۔

تفصیلات کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان اور ان کی ٹیم نے کارروائی کرتے ہوئے خواتین کو نشانہ بنانے والی اوڈ گینگ کی دو خواتین ملزمان کو گرفتار کیا۔ پولیس کے مطابق ملزمان بینکوں سے رقم نکلوا کر بازار آنے والی خواتین کا پیچھا کرتی تھیں اور موقع ملتے ہی ان کے پرس اور نقدی چوری کر کے فرار ہو جاتی تھیں۔

پولیس نے ملزمان کے قبضے سے ایک لاکھ پانچ ہزار روپے نقدی بھی برآمد کر لی ہے۔

ڈسٹرکٹ پولیس آفیسر جہلم شفیق احمد چوہدری نے کہا ہے کہ جہلم پولیس شہریوں کے جان و مال کے تحفظ کے لیے ہمہ وقت کوشاں ہے اور سنگین نوعیت کے مقدمات میں ملوث ملزمان کسی رعایت کے مستحق نہیں۔