ڈپٹی کمشنر جہلم نے پنڈ دادنخان کے اسکولوں میں نہم جماعت کے ناقص نتائج پر سکول ہیڈز طلب کر لئے

جہلم: تحصیل پنڈ دادنخان میں نہم جماعت کے حالیہ نتائج میں طلبہ و طالبات کی اکثریت کے فیل ہونے پر ڈپٹی کمشنر جہلم میثم عباس نے سخت نوٹس لیتے ہوئے تمام سکول ہیڈز کو ڈی سی آفس طلب کرلیا۔ اس موقع پر خصوصی اجلاس منعقد کیا گیا جس میں سی ای او ایجوکیشن نازیہ شہزادی اور متعلقہ سکولوں کے ہیڈز نے شرکت کی۔

اجلاس میں سی ای او ایجوکیشن نے ڈپٹی کمشنر کو تفصیلات سے آگاہ کیا، جس پر ڈی سی جہلم نے ناقص کارکردگی پر شدید برہمی کا اظہار کرتے ہوئے مختلف سکولوں کے ہیڈز سے وضاحت طلب کی۔

ڈی سی میثم عباس نے کہا کہ یہ صورتحال باعث شرم ہے کہ تحصیل پنڈ دادن خان کے اسکولوں میں طلبہ کی بڑی تعداد بری طرح ناکام ہوئی، جبکہ بعض سکولوں کا رزلٹ صفر فیصد رہا۔ انہوں نے واضح کیا کہ اس ناکامی کی تمام تر ذمہ داری سکول ہیڈز اور اساتذہ پر عائد ہوتی ہے۔

مختلف سکول ہیڈز نے نتائج کی خرابی کی وجوہات اور سہولیات کی کمی کا ذکر کیا، تاہم ڈی سی نے مؤقف مسترد کرتے ہوئے کہا کہ موجودہ وسائل کے ساتھ کئی اسکولوں نے بہترین کارکردگی دکھائی ہے، لہٰذا کوئی بہانہ قبول نہیں کیا جائے گا۔ انہوں نے سی ای او ایجوکیشن کو ہدایت دی کہ ناقص نتائج دینے والے سکول ہیڈز کو شوکاز نوٹس جاری کیے جائیں، انہیں تحصیل بدر کیا جائے اور ان کی اے سی آرز میں ریڈ انٹری کی جائے۔

ڈی سی میثم عباس نے واضح کیا کہ حکومت پنجاب کی جانب سے بھاری تنخواہیں لینے والے اساتذہ اور ہیڈز اگر نتائج بہتر نہیں بنا سکتے تو ایسے افراد کی محکمہ تعلیم میں کوئی جگہ نہیں۔

سی ای او ایجوکیشن نے ڈپٹی کمشنر کی ہدایات پر عمل درآمد شروع کرتے ہوئے متعلقہ سکول ہیڈز کے خلاف محکمانہ کارروائی کا آغاز کر دیا ہے۔

یاد رہے کہ حالیہ نتائج کے مطابق پنڈ دادن خان کے متعدد سکولوں کا رزلٹ صفر فیصد جبکہ ضلع جہلم کے بیشتر سکولوں کا نتیجہ 20 فیصد سے بھی کم رہا، جس پر اعلیٰ حکام نے سخت ایکشن کی ہدایت جاری کی ہے۔