معروف سماجی شخصیت ماسٹر شاہد محمود مغل کی والدہ 99 برس کی عمر میں انتقال کر گئیں

پڑی درویزہ: مقامی فلاحی و ترقیاتی کمیٹی پڑی درویزہ کے مرکزی کردار اور معروف سماجی شخصیت ماسٹر شاہد محمود مغل کی والدہ ماجدہ طویل علالت کے بعد 99 برس کی عمر میں انتقال کر گئیں۔ ان کی نماز جنازہ میں سیاسی، سماجی اور مختلف شعبہ ہائے زندگی سے تعلق رکھنے والی شخصیات سمیت اہلِ علاقہ کی بڑی تعداد نے شرکت کی۔

تفصیلات کے مطابق ماسٹر شاہد محمود مغل کی والدہ ماجدہ طویل عرصے سے علیل تھیں اور گزشتہ روز انتقال کر گئیں۔ مرحومہ کے پسماندگان میں تین بیٹے خالد محمود، شاہد محمود اور طارق محمود مغل جبکہ دو بیٹیاں شامل ہیں۔

مرحومہ کی نماز جنازہ پڑی درویزہ کے شرقی بابا رحمت اللہ قبرستان میں ادا کی گئی، جس کی امامت سجادہ نشین دربار عالیہ چھبر سیداں پیر غلام شاہ نے کی۔

نماز جنازہ میں عوام کی کثیر تعداد کے علاوہ پاکستان پیپلز پارٹی ضلع جہلم کے جنرل سیکرٹری اور سابق امیدوار برائے رکن صوبائی اسمبلی مرزا عبدالغفار، مرزا جہانگیر مغل، سید امجد علی بخاری، سابق صدر ٹیچر یونین محمد افضل کیانی سمیت متعدد سیاسی و سماجی شخصیات نے شرکت کی۔

بعد ازاں مرحومہ کو آہوں اور سسکیوں کے درمیان سوگواران کی موجودگی میں شرقی قبرستان پڑی درویزہ میں سپرد خاک کر دیا گیا۔ اس موقع پر شرکاء نے مرحومہ کے درجات کی بلندی اور پسماندگان کے لیے صبرِ جمیل کی دعا کی۔