کشمیر چوک تا بس اسٹینڈ نکاسی آب کا نظام درہم برہم، شہری مشکلات کا شکار
پنڈدادنخان: کشمیر چوک سے بس اسٹینڈ تک نکاسی آب کا نظام بری طرح متاثر ہو گیا ہے جس کے باعث سڑکوں پر گندا پانی جمع ہو رہا ہے اور پیدل چلنے والوں سمیت گاڑیوں کو شدید مشکلات کا سامنا کرنا پڑ رہا ہے۔
مقامی شہریوں کے مطابق علاقے میں سیوریج اور نکاسی آب کا نظام طویل عرصے سے خراب ہے جس کی وجہ سے گندا پانی سڑکوں پر کھڑا رہتا ہے۔ اس صورتحال کے باعث نہ صرف ٹریفک کی روانی متاثر ہو رہی ہے بلکہ بدبو اور گندگی سے علاقہ مکین بھی شدید پریشانی میں مبتلا ہیں۔
شہریوں کا کہنا ہے کہ اس مسئلے کے حل کے لیے جب متعلقہ اداروں سے رابطہ کیا جاتا ہے تو میونسپل کمیٹی اور ستھرا پنجاب ٹیم ایک دوسرے پر ذمہ داری ڈالتی نظر آتی ہیں جس کے باعث مسئلہ جوں کا توں برقرار ہے۔
علاقہ مکینوں اور تاجروں نے ضلعی انتظامیہ سے مطالبہ کیا ہے کہ کشمیر چوک سے بس اسٹینڈ تک نکاسی آب کے نظام کو فوری طور پر درست کیا جائے، مین ہولز کی مرمت کی جائے اور سڑکوں پر کھڑا پانی نکال کر شہریوں کو درپیش مشکلات کا خاتمہ کیا جائے۔
