جہلم کے مختلف ہوٹلز پر ناقص صفائی اور مضر صحت کھانوں کی فروخت کا انکشاف
جہلم شہر سمیت جی ٹی روڈ کے اطراف میں قائم مختلف ہوٹلز پر ناقص صفائی اور مضر صحت کھانوں کی فروخت دھڑلے سے جاری، شہری مضر صحت کھانا کھانے سے ہسپتال پہنچنے لگے، پنجاب فوڈ اتھارٹی کارروائیاں کرنے کی بجائے سب اچھا ہے کی رپورٹس بھجوانے میں مصروف ہیں۔
تفصیلات کے مطابق جہلم شہر اور جی ٹی روڈ کے دونواں اطراف سمیت مضافاتی علاقوں میں قائم ہوٹلوں میں صفائی ستھرائی کے ناقص انتظامات اور مضر صحت کھانوں کی فروخت دھڑلے سے جاری ہے، ہوٹلز مالکان معیاری ، حفظان صحت کے اصولوں کو نظر انداز کرتے ہوئے پیسے بٹورنے میں مصروف دکھائی دیتے ہیں۔
ہوٹلز میں کام کرنے والے ملازمین سے لے کر کاریگر تک ہر شخص کے ناخنوں میں میل ، گندے کپڑے ، لمبے بالوں ا ور حفظانِ صحت کے اصولوں کے خلاف کام کرتے دکھائی دیتے ہیں۔
دوسری جانب ہوٹلوں کی بھر مار کی وجہ سے جی ٹی روڈ سمیت شہر میں تجاوزات اس حد بڑھ چکی ہیں کہ شہریوں کا پیدل چلنااور چھوٹی گاڑیوں کاسڑکوں پر سے گزرنامحال ہو چکا ہے۔ ہوٹلز مالکان نے مضافاتی علاقوں میں تندور وغیرہ گلیوں میں لگا رکھے ہیں۔ پنجاب فوڈ اتھارٹی اور متعلقہ انتظامیہ خاموش تماشائی کا کردار ادا کر رہی ہے۔
جہلم شہر کی سماجی، رفاعی، فلاحی اور شہری تنظیموں کے عمائدین نے ڈی جی پنجاب فوڈ اتھارٹی ایڈوائزر صوبائی محتسب پنجاب جہلم سے نوٹس لینے کا مطالبہ کیا ہے۔
