ہنڈا موٹر سائیکل سی ڈی 70 اور 125 کی قیمتوں میں حیرت انگیز کمی

پاکستانی روپے کی قدر میں بہتری اورامریکی ڈالر سستا ہونے پر ہنڈا موٹر سائیکل کی قیمتوں میں نمایاں کمی ہوئی ہے۔

میڈیا رپورٹس کے مطابق 70 سی سی موٹرسائیکل کی قیمت میں 22 ہزار روپے کی بڑی کمی سامنے آئی ہے۔ 125 کی قیمت میں 33 ہزار 500 روپے کی کمی ہوئی ہے ۔ہنڈا 125 اسپیشل ایڈیشن میں 38 ہزار 500 کی کمی سامنے آئی ہے۔

دوسری جانب ملک میں موٹرسائیکلوں کی فروخت میں 9 اعشاریہ 85 فیصد کی کمی ہوئی ہے ۔

ملک میں موٹر سائیکلوں اور تین پہیوں والی وہیکلز کی فروخت میں گزشتہ سال کے اسی مہینوں کی فروخت کے مقابلے میں رواں مالی سال (2023-24) کے پہلے تین مہینوں کے دوران 9 اعشاریہ 85 فیصد کی کمی دیکھی گئی ہے۔

پاکستان آٹوموبائل مینوفیکچرنگ ایسوسی ایشن کے مطابق جولائی سے ستمبر (2022-23) میں 298,405 یونٹس کی فروخت کے مقابلے میں 268,990 موٹر سائیکلیں اور تھری وہیلر فروخت ہوئے۔ہونڈا موٹر سائیکلوں کی فروخت 250,132 یونٹس سے 7.19 فیصد کم ہو کر 232,139 یونٹ رہ گئی۔

سوزوکی موٹر سائیکلوں کی فروخت 10,007 یونٹس سے 62 اعشاریہ 27 فیصد کم ہو کر 3,775 یونٹس رہ گئی۔اسی طرح یاماہا موٹر بائیکس کی فروخت بھی 3,726 یونٹس سے گھٹ کر 2,555 یونٹس رہ گئی اس طرح اس میں 31 اعشاریہ 42 فیصد کی کمی واقع ہوئی جبکہ روڈ پرنس موٹر بائیکس کی فروخت 9,273 یونٹس سے 55 اعشاریہ 59 فیصد کم 4118یونٹس فروخت ہوئےہیں۔

یونائیٹڈ موٹرسائیکلوں کی فروخت 20,369 یونٹس سے 21,803 یونٹس تک 7 اعشاریہ 04 فیصد اضافے کے ساتھ دیکھی گئی۔

یونائیٹڈ آٹو تھری وہیلر کی فروخت 412 یونٹس سے کم ہو کر 218 یونٹس رہ گئی جبکہ سازگار تھری وہیلر کی فروخت 31 اعشاریہ 14 فیصد اضافے کے ساتھ 2,193 یونٹس سے 2,876 یونٹس تک پہنچ گئی۔

اعداد و شمار سے معلوم ہوتا ہے کہ چنگچی تھری وہیلر کی فروخت میں 1,365 یونٹس سے 1,335 یونٹس تک 2 اعشاریہ 19 فیصد کی معمولی کمی واقع ہوئی ہے۔