بارشوں کا نیا سلسلہ، این ڈی ایم اے نے الرٹ جاری کردیا

جہلم: نیشنل ڈیزاسٹر مینجمنٹ اتھارٹی (این ڈی ایم اے) نے ملک کے بالائی علاقوں میں 25 سے 30 ستمبر 2026ء کے دوران متوقع بارشوں اور ممکنہ موسمی خطرات کے پیش نظر الرٹ جاری کر دیا ہے۔

این ڈی ایم اے کے مطابق بالائی خیبر پختونخوا، آزاد کشمیر، گلگت بلتستان اور اسلام آباد سمیت مختلف علاقوں میں گرج چمک کے ساتھ بارش متوقع ہے، جبکہ بارشوں کے باعث پہاڑی علاقوں اور برساتی ندی نالوں میں اچانک طغیانی کا خدشہ ہے۔ این ڈی ایم اے کی تازہ صورتحال اور وارننگز میں پنجاب، خیبر پختونخوا، گلگت بلتستان اور آزاد کشمیر کے لیے بارش اور سیلاب سے متعلق الرٹس بھی جاری کیے گئے ہیں۔

این ڈی ایم اے کے مطابق مغربی ہواؤں کے نظام کی شدت میں اضافے کے باعث مختلف علاقوں میں موسلادھار بارش، گرج چمک اور تیز ہواؤں کا امکان ہے، جس کے نتیجے میں پہاڑی علاقوں میں لینڈ سلائیڈنگ جبکہ برساتی ندی نالوں اور نشیبی علاقوں میں طغیانی کا خطرہ پیدا ہو سکتا ہے۔

گلگت بلتستان میں استور، اسکردو، روندو، گھانچے اور شگر جبکہ آزاد کشمیر میں نیلم ویلی، حویلی، پونچھ اور سدھنوتی میں سیلابی صورتحال کا خدشہ ظاہر کیا گیا ہے۔

خیبر پختونخوا کے سوات، باجوڑ، دیر، کوہستان، کولئی پالس، بٹگرام اور مانسہرہ سمیت مختلف اضلاع میں بھی ممکنہ سیلاب اور شدید بارشوں کے خطرے کی نشاندہی کی گئی ہے۔

این ڈی ایم اے کے مطابق 30 ستمبر تک پوٹھوہار ریجن، پنجاب اور خیبر پختونخوا کے مختلف علاقوں میں گرج چمک کے ساتھ تیز بارش اور بعض مقامات پر ژالہ باری بھی متوقع ہے۔ خوشاب، سرگودھا، چنیوٹ، فیصل آباد، جھنگ، بھکر، لیہ اور ڈیرہ غازی خان سمیت ملحقہ علاقوں میں تیز ہواؤں، آندھی اور گرج چمک کے ساتھ بارش کا امکان ہے۔

خیبر پختونخوا میں دیر، سوات، بونیر، مالاکنڈ، شانگلہ، بٹگرام، کوہستان، مانسہرہ، ایبٹ آباد، ہری پور، نوشہرہ، صوابی، مردان، پشاور، کرم، ہنگو، کرک، بنوں، لکی مروت، ڈیرہ اسماعیل خان اور وزیرستان میں بھی شدید بارش متوقع ہے۔

جہلم سمیت پوٹھوہار میں شہری سیلاب کا خدشہ

این ڈی ایم اے کے مطابق اسلام آباد، راولپنڈی، اٹک، چکوال، جہلم، مری اور گلیات میں شدید بارش کے باعث شہری علاقوں میں سیلابی صورتحال پیدا ہونے کا خدشہ ہے۔ این ڈی ایم اے کی موجودہ وارننگز میں پوٹھوہار ریجن، جس میں جہلم بھی شامل ہے، کے لیے گرج چمک اور شدید بارش کے خطرے کی نشاندہی کی گئی ہے۔

اسی طرح میانوالی، خوشاب، بھکر، لیہ اور سیالکوٹ سمیت دیگر علاقوں میں بھی شہری سیلاب کا خطرہ ظاہر کیا گیا ہے۔

لاہور، گوجرانوالہ، گجرات اور سرگودھا میں بھی شدید بارش کے نتیجے میں شہری علاقوں میں سیلابی صورتحال پیدا ہونے کا خدشہ ہے، جبکہ فیصل آباد، اوکاڑہ، ساہیوال اور جھنگ سمیت مختلف علاقوں میں بھی موسلادھار بارش کے باعث شہری سیلاب کا خطرہ موجود ہے۔

متعلقہ اداروں کو پیشگی اقدامات کی ہدایت

این ڈی ایم اے نے متعلقہ اداروں کو ممکنہ سیلاب اور دیگر موسمی خطرات سے نمٹنے کے لیے پیشگی اقدامات کی ہدایت کر دی ہے۔ اداروں کو ممکنہ متاثرہ علاقوں میں ایمرجنسی رسپانس ٹیمیں اور ضروری وسائل پہلے سے تیار رکھنے، بارش کی صورتحال اور برساتی ندی نالوں کی مسلسل نگرانی کرنے اور کسی بھی ہنگامی صورتحال میں فوری کارروائی یقینی بنانے کی ہدایت کی گئی ہے۔

این ڈی ایم اے کی جانب سے جاری انفراسٹرکچر ایڈوائزری میں بھی شدید بارش کے نتیجے میں پانی کے جمع ہونے، نکاسیٔ آب کے مسائل، لینڈ سلائیڈنگ اور شہری و بنیادی ڈھانچے کو ممکنہ نقصان کے خطرات کی نشاندہی کرتے ہوئے پیشگی حفاظتی اقدامات پر زور دیا گیا ہے۔

شہریوں کو محتاط رہنے کی ہدایت

این ڈی ایم اے نے شہریوں کو ہدایت کی ہے کہ بارش کے دوران برساتی ندی نالوں، پہاڑی نالوں اور پانی میں ڈوبی سڑکوں کو عبور کرنے سے گریز کیا جائے۔ نشیبی اور خطرے سے دوچار علاقوں میں رہنے والے شہری خصوصی احتیاط اختیار کریں اور غیر ضروری سفر سے گریز کرتے ہوئے حفاظتی اقدامات کو یقینی بنائیں۔

این ڈی ایم اے نے شہریوں اور متعلقہ اداروں پر زور دیا ہے کہ موسمی صورتحال پر مسلسل نظر رکھی جائے اور کسی بھی ہنگامی صورتحال میں مقامی انتظامیہ اور ریسکیو اداروں کی ہدایات پر عمل کیا جائے۔