ضلع جہلم کے نڈر، غیور اور محب وطن صحافی ہر حال میں افواج پاکستان کے شانہ بشانہ کھڑے ہیں، جہلم پریس کلب

جہلم: افواج پاکستان کی بھارت کے خلاف جرات مندانہ کارروائی اور آپریشن "بنیان مرصوص” کی شاندار کامیابی پر جہلم پریس کلب میں "جشنِ فتح” کے عنوان سے خصوصی تقریب کا انعقاد کیا گیا۔

تقریب کا آغاز تلاوتِ کلام پاک سے کیا گیا۔ تقریب میں صحافیوں، سماجی شخصیات اور مختلف مکاتب فکر سے تعلق رکھنے والے افراد نے شرکت کی۔ تقریب میں پاک فوج کے حق میں زبردست نعرے بازی کی گئی اور ملکی سلامتی و دفاع پر افواجِ پاکستان کو زبردست خراجِ تحسین پیش کیا گیا۔

اس موقع پر صدر جہلم پریس کلب مہر محمد الیاس نے کہا کہ ضلع جہلم کے نڈر، غیور اور محب وطن صحافی ہر حال میں پاک فوج کے شانہ بشانہ کھڑے ہیں۔ افواجِ پاکستان نے بھارتی جارحیت کا مؤثر جواب دے کر پوری قوم کا سر فخر سے بلند کر دیا ہے۔ پاکستان ہمیشہ زندہ باد رہے گا۔

چیئرمین پریس کلب چوہدری عابد محمود نے اپنے خطاب میں کہا کہ پاک فوج نے دشمن کو منہ توڑ جواب دے کر اپنی پیشہ ورانہ صلاحیتوں کا لوہا دنیا بھر میں منوایا ہے۔ پاک فضائیہ نے دشمن کے اندر گھس کر اس کے دفاعی نظام کو مفلوج کر دیا، جو پوری قوم کے لیے باعثِ فخر ہے۔

جنرل سیکرٹری الیاس صادق وٹو نے کہا کہ افواجِ پاکستان نے بھارتی غرور کو خاک میں ملا دیا ہے اور دنیا بھر میں ایک نئی تاریخ رقم کی ہے۔ آپریشن "بنیان مرصوص” میں حصہ لینے والے جوانوں کو ہم سلام پیش کرتے ہیں۔

سرپرست اعلیٰ راجہ جہانزیب خان نے کہا کہ پاک فوج نے ایمان، جرات اور جذبہ شہادت سے سرشار ہو کر ایک بار پھر ثابت کر دیا ہے کہ وہ دنیا کی طاقتور ترین افواج میں سے ہے۔ ہمیں اپنی فوج اور اس کے جذبے پر فخر ہے۔

صدر پرنٹ میڈیا میاں محمد ساجد نے کہا کہ بھارت نے رات کی تاریکی میں حملہ کر کے بزدلی کا مظاہرہ کیا، جس کا پاک فوج نے بھرپور جواب دے کر دشمن کو خاموش کر دیا۔ پاکستان کا واحد ادارہ افواج پاکستان ہی ہے جو ملک کی بقاء اور سالمیت کی ضمانت ہے۔

صدر الیکٹرانک میڈیا عامر کیانی نے کہا کہ افواجِ پاکستان کی جوابی کارروائیوں کے بعد بھارت میں سناٹا چھا گیا ہے۔ انہوں نے کہا کہ ہماری فوج نے نہ صرف دشمن کی جارحیت کا جواب دیا بلکہ اس کی اہم تنصیبات کو نشانہ بنا کر اسے سبق سکھایا۔

معروف سماجی شخصیت اور سابق صدر پریس کلب ملک وسیم اختر نے کہا کہ پاک فوج نے قوم کی ترجمانی کرتے ہوئے مکار دشمن بھارت کی اینٹ سے اینٹ بجا دی۔ انہوں نے کہا کہ افواجِ پاکستان کی اس فتح نے ایک بار پھر ثابت کیا ہے کہ وہ دنیا کی بہترین افواج میں شامل ہے۔

صدر ڈیجیٹل میڈیا فضل خان نے کہا کہ سپہ سالار جنرل سید عاصم منیر کی قیادت میں پاکستان نے عظیم کامیابی حاصل کی، اور 25 کروڑ پاکستانی عوام اپنی فوج کے ساتھ سیسہ پلائی دیوار کی طرح کھڑے ہیں۔

تقریب کا اختتام دعائے خیر سے کیا گیا جس میں ملک کی سلامتی، شہداء کے درجات کی بلندی اور افواج پاکستان کی کامیابی کے لیے خصوصی دعائیں کی گئیں۔