پنڈ دادنخان میں قتل کے مقدمات میں مطلوب اشتہاری مجرمان گرفتار

پنڈ دادنخان پولیس نے بڑی کارروائیاں کرتے ہوئے قتل کے مقدمات میں مطلوب اشتہاری مجرمان کو گرفتار کر لیا۔

تفصیلات کے مطابق ڈی پی او جہلم طارق عزیز سندھو کی ہدایت پر تھانہ پنڈ دادنخان پولیس کی اہم کارروائیاں جاری ہیں۔ ایس ایچ او تھانہ پنڈ دادنخان اور ان کی ٹیم نے قتل کے مقدمہ میں مطلوب ایک اشتہاری مجرم کو گرفتار کر لیا۔

پولیس کے مطابق ملزم سے آلہ قتل پسٹل 30 بور معہ ایمونیشن بھی برآمد کر لیا گیا۔ ملزم سال 2023 سے قتل کے مقدمہ میں مطلوب تھا اور گرفتاری سے بچنے کے لیے روپوش ہو گیا تھا، تاہم پولیس نے جدید سائنٹفک طریقہ کار کو بروئے کار لاتے ہوئے اسے گرفتار کیا۔

دوسری کارروائی میں پولیس نے قتل کے الگ مقدمہ میں مطلوب دو اشتہاری مجرمان کو بھی حراست میں لے لیا ہے۔

ڈی پی او جہلم طارق عزیز سندھو نے کہا کہ اشتہاری مجرمان کے خلاف بھرپور کریک ڈاؤن جاری ہے اور قانون شکن عناصر کو کسی صورت رعایت نہیں دی جائے گی۔