عوام کے جان و مال کے تحفظ کو ہر صورت یقینی بنایا جائے گا، ڈی پی او جہلم طارق عزیز سندھو
جہلم: ڈسٹرکٹ پولیس آفیسر جہلم طارق عزیز سندھو کی زیرِ صدارت ڈی پی او آفس جہلم میں ڈسٹرکٹ کوآرڈینیشن کمیٹی کا اہم اجلاس منعقد ہوا، جس میں ضلع بھر کی سکیورٹی صورتحال، عوامی تحفظ اور ٹریفک نظم و ضبط سے متعلق امور کا تفصیلی جائزہ لیا گیا۔
اجلاس میں ڈی ایس پی ٹریفک، ڈی ایس پی موٹر وے پولیس، ڈی ایس پی پی ایچ پی، ڈی او سی ٹی ڈی، اسپیشل برانچ، انچارج سیف سٹی جہلم، ڈسٹرکٹ انچارج ایلیٹ فورس سمیت دیگر قانون نافذ کرنے والے اداروں کے افسران نے شرکت کی۔
میٹنگ کے دوران زیرِ تعمیر عمارتوں، سڑکوں اور دیگر ترقیاتی منصوبوں پر حفاظتی اقدامات کو مزید سخت کرنے، وارننگ سائن بورڈز کی تنصیب، حفاظتی باڑ لگانے، رات کے وقت مناسب روشنی کے انتظامات اور ٹریفک کی روانی برقرار رکھنے کے حوالے سے تفصیلی غور و خوض کیا گیا۔
میٹنگ میں اس بات پر زور دیا گیا کہ عوام کے جان و مال کے تحفظ کو ہر صورت یقینی بنایا جائے اور کسی بھی ناخوشگوار واقعے کی صورت میں فوری اور مربوط رد عمل اختیار کیا جائے۔
ڈی پی او جہلم نے اجلاس سے خطاب کرتے ہوئے مشکوک سرگرمیوں پر کڑی نظر رکھنے، سرچ اینڈ کومبنگ آپریشنز، ناکہ بندی اور سنیپ چیکنگ کے عمل کو مزید مؤثر بنانے کی ہدایات جاری کیں۔ انہوں نے افسران کو عوامی شکایات کے فوری ازالے اور پولیس سروس ڈیلیوری میں شفافیت اور بہتری لانے پر بھی زور دیا۔
اجلاس کے اختتام پر اس عزم کا اظہار کیا گیا کہ ضلع میں پائیدار امن کے قیام، جرائم کے خاتمے اور عوام کے اعتماد کے فروغ کے لیے تمام ادارے مشترکہ اور مربوط حکمتِ عملی کے تحت کام کرتے رہیں گے۔
