مہنگائی کی نئی لہر، گھی، کوکنگ آئل اور آٹے کی قیمتوں میں اضافہ

جہلم سمیت ملک بھر میں اشیائے خورونوش کی قیمتوں میں ایک بار پھر اضافے کے باعث عوام کی مشکلات میں اضافہ ہو گیا ہے، جبکہ روزمرہ استعمال کی بنیادی اشیاء مزید مہنگی ہونے سے گھریلو بجٹ بری طرح متاثر ہو رہا ہے۔

درجہ اول گھی اور کوکنگ آئل کی قیمتوں میں 3 روپے فی کلوگرام اضافہ کر دیا گیا ہے، جس کے بعد گھی کی نئی قیمت 598 روپے فی کلوگرام تک پہنچ گئی ہے۔

اسی طرح سن فلاور کوکنگ آئل کی قیمت بھی بڑھ کر 618 روپے تک جا پہنچی ہے، جس سے شہری شدید پریشانی کا شکار ہیں۔

دوسری جانب آٹے کی قیمتوں میں بھی مسلسل اضافہ جاری ہے۔ گزشتہ ہفتے 10 سے 20 کلوگرام آٹے کے تھیلے کی قیمت میں 120 سے 200 روپے تک اضافہ ریکارڈ کیا گیا، جس کے باعث عام صارفین پر مالی بوجھ مزید بڑھ گیا ہے۔

ماہرین کا کہنا ہے کہ اشیائے ضروریہ کی قیمتوں میں مسلسل اضافہ عام آدمی کے لیے روزمرہ زندگی کو مزید مشکل بنا رہا ہے، جبکہ متوسط اور غریب طبقہ سب سے زیادہ متاثر ہو رہا ہے۔

شہریوں نے حکومت سے مطالبہ کیا ہے کہ مہنگائی پر قابو پانے اور عوام کو فوری ریلیف فراہم کرنے کے لیے مؤثر اقدامات کیے جائیں تاکہ لوگوں کی مشکلات میں کمی آ سکے۔