جہلم: انسپکٹر جنرل آف پولیس پنجاب راؤ عبدالکریم کے احکامات پر ڈسٹرکٹ پولیس آفیسر جہلم طارق عزیز سندھو نے پولیس لائن جہلم میں ضلع بھر کے پولیس افسران کے ساتھ ایک خصوصی بریفنگ سیشن کا انعقاد کیا۔
بریفنگ میں ایس پی انویسٹیگیشن، تمام سرکلز کے ایس ڈی پی اوز، ضلع کے ایس ایچ اوز، تفتیشی افسران، محررز، فرنٹ ڈیسک اسٹاف اور دیگر متعلقہ پولیس افسران نے شرکت کی۔
بریفنگ کے دوران ڈی پی او جہلم نے ضلع میں امن و امان کی مجموعی صورتحال، جرائم کی روک تھام، اشتہاری و عادی مجرمان کے خلاف کارروائیوں، پتنگ بازی جیسے خطرناک رجحانات کے خاتمے اور منشیات فروشوں سمیت سماج دشمن عناصر کے خلاف کریک ڈاؤن کو مزید مؤثر بنانے کے حوالے سے اہم ہدایات جاری کیں۔
ڈی پی او جہلم نے ہدایت کی کہ تھانہ کلچر کو بہتر سے بہترین بنایا جائے، سائلین کے مسائل ترجیحی بنیادوں پر حل کیے جائیں اور عوام کے ساتھ خوش اخلاقی اور پیشہ ورانہ رویہ اپنایا جائے۔ انہوں نے گشت کے نظام کو مزید فعال بنانے، حساس مقامات کی کڑی نگرانی یقینی بنانے اور کسی بھی ہنگامی صورتحال سے نمٹنے کے لیے ہمہ وقت الرٹ رہنے کی بھی تاکید کی۔
انہوں نے واضح کیا کہ میرٹ، انصاف اور قانون کی بالادستی کو ہر صورت یقینی بنایا جائے گا اور فرائض کی انجام دہی میں کسی قسم کی غفلت یا لاپرواہی برداشت نہیں کی جائے گی۔
ڈی پی او طارق عزیز سندھو نے کہا کہ جہلم پولیس شہریوں کے جان و مال کے تحفظ، جرائم کے خاتمے اور پرامن معاشرے کے قیام کے لیے تمام دستیاب وسائل بروئے کار لا رہی ہے اور عوام کے تعاون سے ضلع کو مزید محفوظ بنانے کے لیے بھرپور اقدامات جاری رکھے جائیں گے۔
-
-
-
-
