موسمِ سرما کے لیے نئے اوقاتِ کار کا اعلان ! یکم نومبر سے نافذ ہوں گے

جہلم: لاہور ہائی کورٹ نے پنجاب بھر کی سول و سیشن عدالتوں کے اوقاتِ کار میں تبدیلی کا نوٹیفکیشن جاری کر دیا ہے، جس کا اطلاق یکم نومبر 2026ء سے ہوگا۔ نوٹیفکیشن کے مطابق نئے اوقاتِ کار 31 مارچ 2027ء تک نافذ العمل رہیں گے۔

تفصیلات کے مطابق لاہور ہائی کورٹ کی جانب سے جاری کردہ نوٹیفکیشن کے تحت پنجاب بھر، بشمول مری، کی سول و سیشن عدالتیں پیر سے جمعرات اور ہفتہ کے روز صبح 9 بجے سے دوپہر ایک بجے تک کام کریں گی۔ دوپہر ایک بجے سے ڈیڑھ بجے تک نماز اور کھانے کے لیے وقفہ ہوگا۔

نوٹیفکیشن کے مطابق جمعہ کے روز عدالتوں کے اوقاتِ کار صبح 9 بجے سے دوپہر ایک بجے تک مقرر کیے گئے ہیں۔

عدالتی اوقاتِ کار میں تبدیلی کے پیشِ نظر شہریوں، وکلا اور مقدمات کے سلسلے میں عدالتوں کا رخ کرنے والے سائلین کو ہدایت کی گئی ہے کہ وہ نئے شیڈول کو مدنظر رکھتے ہوئے اپنی پیشیوں اور دیگر عدالتی امور کی منصوبہ بندی کریں، تاکہ انہیں کسی قسم کی پریشانی یا تاخیر کا سامنا نہ کرنا پڑے۔

لاہور ہائی کورٹ کی جانب سے جاری کردہ نوٹیفکیشن کے تحت پنجاب بھر کی متعلقہ سول و سیشن عدالتیں مقررہ نئے اوقاتِ کار کے مطابق عدالتی امور انجام دیں گی۔