سیاست کا مقصد اقتدار نہیں بلکہ عوامی خدمت اور علاقہ کی فلاح و بہبود کیلئے کام کرنا ہے، چوہدری ندیم خادم

پنڈدادنخان: چوہدری ندیم خادم نے کہا کہ اقتدار کے بجائے عوامی خدمت اور علاقہ کی فلاح و بہبود کے لیے کام کرنا سیاست کا مقصد ہے۔وزیر اعلی پنجاب مریم نواز کے ویژن کے مطابق ضلع جہلم کو گرین اینڈ کلین مہم کے تحت صاف اور سرسبز بنائیں گے ۔

چیئرمین گرین اینڈ کلین پنجاب ضلع جہلم و سابق ایم پی اے چوہدری ندیم خادم نے وزیر اعلی پنجاب مریم نواز کے ویژن گرین اینڈ کلین پنجاب کے حوالہ سے اسسٹنٹ کمشنر آفس پنڈدادنخان میں منعقد اجلاس میں گفتگو کرتے ہوئے کہا کہ گرین اینڈ کلین مہم کو کامیاب بنانے کے لیے تحصیل پنڈدادنخان کے صنعتی اداروں کا بھی اہم کردار ہوگا۔

اجلاس میں میں مسلم لیگ (ن) سابق ایم پی حاجی ناصر محمود للِہ، اسسٹنٹ کمشنر پنڈدادنخان اسامہ شیرون نیازی، صدر تحصیل پریس کلب پنڈدادنخان اختر آرائیں، سابق چیئرمین میونسپل کمیٹی کھیوڑہ ملک فیصل عباس اعوان، ملک زاہد احمد، ملک قمر حسین، حاجی شاہد رضا، چوہدری انتظارالحق، ملک غلام مصطفیٰ مٹھو، چیئرمین سالٹ رینج پریس کلب سلیم باگڑی، چیئرمین یو سی للِہ چوہدری اسد بشیر اللہ سمیت تحصیل بھر سے معززین نے شرکت کی۔

چوہدری ندیم خادم نے گفتگو کرتے ہوئے کہا کہ وزیر اعلی پنجاب مریم نواز کے ویژن گرین اینڈ کلین پنجاب کے مطابق ضلع جہلم کو صاف اور سرسبز بنانے کے لیے سب کو مل کر اپنا اپنا کردار ادا کرنا ہوگا۔ ضلع بھر میں صفائی کے موثر اقدامات کیے جارہے ہیں جبکہ پودے لگانے کا عمل بھی جلد شروع ہوجائے گا جس کے لیے فنڈز بحال کئے جائیں گے۔

انہوں نے کہا کہ تحصیل پنڈدادنخان میں صفائی کے انتظامات کے لیے خصوصی اقدامات کیے جائیں گے جبکہ مہم کو کامیاب بنانے کے لیے صنعتی اداروں سے بھی مدد لی جائے گی۔

ایک سوال کے جواب میں چوہدری ندیم خادم نے کہا کہ للِہ تا جہلم ڈیول کیرج وے منصوبہ اس وقت ضلع جہلم اور بالخصوص پنڈدادنخان کے عوام کے لیے اذیت کا سبب بنا ہوا ہے، انشاء اللہ پنجاب اور وفاق حکومت سے اسکے فنڈز کی بحالی پر زور دیا جائے گا تاکہ عوام کی مشکلات میں کمی آسکے۔

انہوں نے مزید کہا کہ سیاست کا مقصد اقتدار نہیں بلکہ عوامی خدمت اور علاقہ کی فلاح و بہبود کے لیے کام کرنا ہے، عوامی خدمت کا سفر جاری رہے گا اور ضلع جہلم کے عوام کے بنیادی مسائل حل کرنے کے لیے کردار ادا کرتے رہیں گے ۔