عید الاضحی کی آمد سے قبل ہی پیاز، ٹماٹر اور مصالحہ جات کی قیمتوں میں اضافہ ہونے لگا

جہلم: عید الاضحی کی آمد سے قبل ہی پیاز ، ٹماٹر اور مصالحہ جات کی قیمتوں میں اضافہ ہونے لگا۔

ذرائع کے مطابق سبزی فروشوں نے پیاز ایک بار پھر مہنگا کردیا ، پیاز ایک بار ایک سنچری عبور کرگیا۔ سرکاری نرخ میں پیاز کی قیمت 110 روپے مقرر کی گئی ہے جبکہ دکاندار 130/140 روپے فی کلو کے حساب سے فروخت کررہے ہیں ۔

تاہم گلی محلوں میں لوڈر رکشوں پر پیازفروخت کرنے والے موبائل دکانداروں نے پیاز 150 سے 170روپے فی کلو کے حساب سے فروخت شروع کردی ہے ۔ اسی طرح ٹماٹر کی قیمتوں کو بھی پر لگ گئے ہیں ۔ جوں جوں عیدالضحیٰ قریب آرہی ہے توں توں سبزیوں کی قیمتوں میں تیزی کے ساتھ اضافہ کیا جارہاہے ۔

دکاندار سرکاری نرخوں کے برعکس 100 فیصد مہنگی سبزیاں فروخت کر رہے ہیں، ٹماٹر کا سرکاری ریٹ40 روپے کلو مقرر کیا گیا ہے جبکہ بازاروں میں ٹماٹر75 روپے فی کلو کے حساب سے فروخت کیا جارہاہے ۔آلو 80 روپے فی کلو سرکاری نرخ نامے کے برعکس مارکیٹ میں 100 روپے فی کلو، ادرک چائنہ575 کی بجائے 700 اور لہسن دیسی 250 کی بجائے 400 روپے فی کلو کے حساب سے فروخت کیا جارہا ہے ۔

اسی طرح گرم موسم میں طلب بڑھتے ہی لیموں کی قیمتیں بھی آسمان سے باتیں کررہی ہیں، سرکاری ریٹ لسٹ کے مطابق دیسی لیموں کی قیمت 410 روپے فی کلو مقرر کی گئی تاہم بازاروں میں لیموں کم از کم 600 روپے فی کلوکے حساب سے فروخت کیا جاتا رہا۔

شہری، سماجی، رفاعی اور فلاحی تنظیموں کے عمائدین نے وزیراعلیٰ پنجاب مریم نواز شریف ، چیف سیکرٹری پنجاب زاہد اختر زمان سے نوٹس لینے اور روز مرہ کے استعمال کی سبزیوں کو سرکاری قیمتوں پر فروخت کرنے کا مطالبہ کیاہے۔