جہلم میں روٹی کی قیمت میں اچانک 6 روپے اضافہ ، شہری پریشان

جہلم شہر اور گردونواح میں روٹی کی قیمت میں اچانک 6 روپے اضافہ کر دیا گیا ہے، جس کے باعث شہریوں کو اضافی مالی بوجھ کا سامنا کرنا پڑ رہا ہے۔

رپورٹ کے مطابق سرکاری نرخ 14 روپے ہونے کے باوجود تنور مالکان نے روٹی 20 روپے میں فروخت کرنا شروع کر دی ہے۔ شہریوں کا کہنا ہے کہ پرائس کنٹرول مجسٹریٹس، پیرا فورس اور انتظامیہ کی خاموشی اس صورتحال پر سوالیہ نشان ہے۔

تنور مالکان کے مطابق ایل پی جی اور آٹے کی قیمتوں میں اضافے کے باعث پیداواری لاگت بڑھ گئی ہے، جبکہ سوئی گیس کی عدم دستیابی نے مسائل میں مزید اضافہ کر دیا ہے۔ ان کا کہنا ہے کہ اگر حکومت گیس اور آٹا مناسب نرخوں پر فراہم کرے تو روٹی کی قیمت کم کی جا سکتی ہے۔

دوسری جانب شہریوں نے اس اچانک اضافے پر شدید تشویش کا اظہار کرتے ہوئے ڈپٹی کمشنر میر رضا اوزگن سے فوری نوٹس لینے اور سرکاری نرخوں پر عملدرآمد یقینی بنانے کا مطالبہ کیا ہے تاکہ عوام کو ریلیف مل سکے۔