انسدادِ گداگری میں کسی قسم کی غفلت برداشت نہیں کی جائے گی، ڈپٹی کمشنر میر رضا اوزگن
جہلم: پیشہ ور گداگری کے خاتمے اور خصوصی افراد کی فلاح و بہبود کے اقدامات کو مزید مؤثر بنانے کے لیے ڈسٹرکٹ اینٹی بیگری کمیٹی اور ڈسٹرکٹ ویلفیئر اینڈ ریہیبیلیٹیشن یونٹ (DWRU) جہلم کا مشترکہ اجلاس ڈپٹی کمشنر میر رضا اوزگن کی زیرِ صدارت منعقد ہوا۔
اجلاس میں اسسٹنٹ کمشنر جہلم، محکمہ صحت، پولیس، ڈسٹرکٹ اٹارنی آفس، ڈسٹرکٹ پبلک پراسیکیوٹر آفس، سوشل ویلفیئر، متعلقہ سرکاری محکموں، غیر سرکاری تنظیموں (این جی اوز) اور خصوصی افراد کے فوکل پرسنز نے شرکت کی۔
اجلاس کے دوران ڈپٹی ڈائریکٹر سوشل ویلفیئر و بیت المال ضلع جہلم نے شرکاء کو "مریم بتاتی ہیں” پورٹل اور ADWC پورٹل کے حوالے سے تفصیلی بریفنگ دی۔ بریفنگ میں خصوصی افراد کے لیے حکومت پنجاب کی جانب سے جاری فلاحی اقدامات، درخواستوں کی جانچ، طبی تشخیص، منظوری کے طریقہ کار اور مستحق افراد تک سہولیات کی فراہمی کے نظام سے آگاہ کیا گیا۔
اجلاس میں ضلع بھر میں جاری انسدادِ گداگری مہم کی پیش رفت، حاصل شدہ اہداف، درپیش چیلنجز اور مختلف اداروں کی ذمہ داریوں پر بھی تفصیلی تبادلۂ خیال کیا گیا، جبکہ مہم کو مزید مؤثر بنانے کے لیے مختلف تجاویز پر غور کیا گیا۔
اس موقع پر ڈپٹی کمشنر میر رضا اوزگن نے تمام متعلقہ محکموں کو ہدایت کی کہ پیشہ ور گداگری کے خاتمے کے لیے جاری مہم کو مزید مربوط، مؤثر اور نتیجہ خیز انداز میں جاری رکھا جائے تاکہ عوامی مقامات پر پیشہ ور گداگری کی روک تھام کو یقینی بنایا جا سکے۔
انہوں نے اس بات پر بھی زور دیا کہ خصوصی افراد کی فلاح و بہبود سے متعلق تمام حکومتی اقدامات میں مکمل شفافیت برقرار رکھی جائے اور درخواستوں کی جانچ، تشخیص اور منظوری کا عمل بروقت مکمل کر کے مستحق افراد تک حکومتی سہولیات کی فراہمی یقینی بنائی جائے۔
ڈپٹی کمشنر نے کہا کہ ضلعی انتظامیہ حکومت پنجاب کے وژن کے مطابق سماجی بہبود، خصوصی افراد کی بحالی اور پیشہ ور گداگری کے خاتمے کے لیے تمام متعلقہ اداروں کے ساتھ مل کر مؤثر اقدامات جاری رکھے گی تاکہ مستحق افراد کو بہتر سہولیات فراہم کی جا سکیں اور معاشرے میں مثبت تبدیلی لائی جا سکے۔
