جشن عید میلاد النبی ﷺ کے موقع پر بھی متعدد علاقوں کی سٹریٹ لائٹس بحال نہ ہو سکیں

جہلم شہر میں ضلع کچہری، میجر اکرم شہید نشانِ حیدر روڈ اور پروفیسر کالونی سمیت متعدد علاقوں کی سٹریٹ لائٹس 12 ربیع الاول کے موقع پر بھی فعال نہ ہوسکیں، جس کے باعث شہری آبادی کے کئی گلی محلے رات کے وقت اندھیرے میں ڈوبے رہے۔

شہریوں کے مطابق اندرونِ شہر کے گنجان آباد علاقوں میں سٹریٹ لائٹس کی خرابی کے حوالے سے متعدد شکایات کے باوجود میونسپل کمیٹی کی جانب سے مسئلہ حل نہیں کیا جاسکا۔ شہریوں کا کہنا ہے کہ عید میلادالنبی ﷺ کے موقع پر شہر کے بعض مخصوص مقامات کو سرچ لائٹس اور ایل ای ڈی لائٹس سے روشن کیا گیا، تاہم گنجان آبادیوں کی گلیوں اور محلوں کو نظر انداز کردیا گیا۔

عوامی حلقوں کا کہنا ہے کہ سٹریٹ لائٹس کی مد میں لاکھوں روپے کا بجٹ مختص ہونے کے باوجود متعدد علاقوں میں روشنی کا مناسب انتظام نہ ہونا متعلقہ حکام کی کارکردگی پر سوالیہ نشان ہے۔

شہریوں نے ایڈمنسٹریٹر میونسپل کمیٹی اور متعلقہ ذمہ داران سے مطالبہ کیا ہے کہ معاملے کا فوری نوٹس لیتے ہوئے اندرونِ شہر کی خراب سٹریٹ لائٹس بحال کی جائیں تاکہ شہریوں کو رات کے اوقات میں آمدورفت کے دوران درپیش مشکلات اور سکیورٹی خدشات کا خاتمہ ہوسکے۔