سوہاوہ میں آوارہ گردی کرنے والے 7 افراد گرفتار، موبائل چور بھی دھر لیا گیا
سوہاوہ پولیس نے کارروائی کرتے ہوئے آوارہ گردی کرنے والے 7 افراد کو گرفتار کر لیا جبکہ موبائل چور بھی دھر لیا گیا۔
تفصیلات کے مطابق ڈسٹرکٹ پولیس آفیسر جہلم شفیق احمد چوہدری کی ہدایات پر جرائم پیشہ عناصر اور امن عامہ میں خلل ڈالنے والے افراد کے خلاف جاری کریک ڈاؤن کے دوران تھانہ سوہاوہ پولیس نے دو اہم کارروائیوں میں آوارہ گردی میں ملوث سات افراد کو گرفتار کر لیا جبکہ چوری شدہ موبائل فونز اپنے قبضے میں رکھنے والے ایک ملزم کو بھی حراست میں لے لیا۔
ترجمان جہلم پولیس کے مطابق ایس ایچ او تھانہ سوہاوہ اور پولیس ٹیم نے مختلف مقامات پر کارروائیاں کرتے ہوئے آوارہ گردی کرنے والے سات ملزمان کو گرفتار کیا۔ پولیس کے مطابق گرفتار افراد عوامی مقامات پر بغیر کسی معقول وجہ کے مشتبہ سرگرمیوں میں مصروف تھے، جس پر انہیں حراست میں لے کر قانونی کارروائی کا آغاز کر دیا گیا۔
پولیس حکام کا کہنا ہے کہ شہریوں کے جان و مال کے تحفظ اور امن و امان کے قیام کے لیے تمام ممکنہ اقدامات بروئے کار لائے جا رہے ہیں۔ عوامی مقامات پر ہلڑ بازی، آوارہ گردی اور امن عامہ میں خلل ڈالنے والے عناصر کے خلاف بلاامتیاز کارروائیاں جاری رہیں گی۔
ایک دوسری اہم کارروائی میں تھانہ سوہاوہ پولیس نے چوری شدہ موبائل فونز اپنے قبضے میں رکھنے والے ایک ملزم کو گرفتار کر لیا۔ پولیس کے مطابق ملزم کے قبضے سے 9 عدد موبائل فونز برآمد کیے گئے ہیں، جن کے بارے میں شبہ ہے کہ وہ چوری شدہ ہیں۔
ترجمان پولیس کے مطابق گرفتار ملزم کے خلاف قانونی کارروائی عمل میں لائی جا رہی ہے جبکہ موبائل فونز کی ملکیت اور دیگر متعلقہ معاملات کی جانچ کے لیے مزید تفتیش جاری ہے۔
ڈسٹرکٹ پولیس آفیسر شفیق احمد چوہدری نے کہا ہے کہ جرائم پیشہ عناصر، چوری شدہ سامان کی خرید و فروخت میں ملوث افراد اور قانون شکن عناصر کے خلاف بلاامتیاز کارروائیاں جاری رہیں گی۔ انہوں نے واضح کیا کہ ایسے عناصر کو ہر صورت قانون کے کٹہرے میں لا کر انصاف کے تقاضے پورے کیے جائیں گے۔
ڈی پی او جہلم نے مزید کہا کہ ضلع بھر میں امن و امان کے قیام، جرائم کے خاتمے اور شہریوں کے جان و مال کے تحفظ کے لیے پولیس متحرک ہے اور قانون کی عملداری کو ہر صورت یقینی بنایا جائے گا۔
