جہلم میں چھوٹی عید کے موقع پر بڑی تیاریاں جاری، شہری شاپنگ کرنے بازاروں میں پہنچ گئے
جہلم میں چھوٹی عید کے موقع پر بڑی تیاریاں جاری، مرد و خواتین عید کی شاپنگ کرنے بازاروں میں پہنچ گئے۔ بازار میں رش زیادہ ہونے سے دکانداروں کی چاندی ہوگئی۔ لیکن مہنگائی کی ستائی ہوئی عوام حکمرانوں سے گلے شکوے کرتے دکھائی دیتے ہیں۔
مہنگائی کے باعث خریداروں کی ایک بڑی تعداد آج بھی ان خوشیوں سے محروم دکھائی دیتی ہے۔ ہر سال عید کا تہوار جوش و جذبے سے منایا جاتا ہے لیکن قیمتو ں میں اضافے کے باعث غریب متوسط طبقہ سے تعلق رکھنے والے والدین اپنے بچوں کے لئے نئے لباس اور جوتے دیکھنے کی حد تک ہی محدود ہو کر رہ جاتے ہیں۔
دوسری طرف رمضان المبارک کا آخری عشرہ شروع ہوتے ہی عید کے لئیے نئے لباس بنوانے کا عمل تیز ہو جاتا ہے۔ مرد و خواتین اپنے ساتھ بچوں کے لیے بھی سامان خریداری کرنے بازاروں کا رخ کر لیتے ہیں۔
عید کی تیاریوں میں مصروف خواتین کا کہنا ہے چھوٹی عید کی بڑی خوشیاں منانے کے لئے پورا مہینہ بے چینی سے انتظار کرتے ہیں۔ رمضان المبارک کے بابرکت مہینے میں روزے رکھنے کے بعد اگلا عمل عید الفطر کے پہلے دن نئے لباس پہن کر عید کی نماز ادا کرنا اسلام کا جز سمجھا جاتا ہے۔
اس طرح عید کے موقع پر نئے لباس پہننا اور نئے جوتے پہننا مرد و خواتین میں نمایاں طور پر پایا جاتا ہے تاہم اس طرح کے مواقع میسر آئیں تو خواتین کسی سے پیچھے رہ جائیں تو یہ ہو ہی نہیں سکتا۔ اس لئے خواتین کے اخرجات کا بھاری بوجھ بھی مردوں کو ہی اٹھانا پڑتا ہے۔
