جہلم سمیت پنجاب بھر میں یکساں ریاضی نصاب نافذ، جنرل ریاضی ختم

جہلم: پنجاب کرکیولم اینڈ ٹیکسٹ بک اتھارٹی (پیکٹا) نے ایک اہم تعلیمی فیصلہ کرتے ہوئے پنجاب بھر میں بشمول جہلم جماعت نہم کے لیے یکساں ریاضی نصاب نافذ کر دیا ہے۔

ذرائع کے مطابق اب جماعت نہم میں تمام طلبہ کو صرف "ریاضی (سائنس)” ہی پڑھائی جائے گی جبکہ جنرل ریاضی کا مضمون مکمل طور پر نصاب سے ختم کر دیا گیا ہے۔

یہ فیصلہ وفاقی حکومت کے طرز پر کیا گیا ہے جس کے تحت اب سائنس اور آرٹس دونوں گروپس کے لیے ایک ہی ریاضی کی کتاب ہوگی۔

پیکٹا کے مطابق یہ اقدام میٹرک سطح پر نصاب میں ہم آہنگی پیدا کرنے کے لیے کیا گیا ہے تاکہ طلبہ کے درمیان تعلیم میں یکسانیت اور معیار برقرار رکھا جا سکے۔

اس حوالے سے تمام تعلیمی اداروں کو مراسلہ جاری کر دیا گیا ہے تاکہ نئے تعلیمی سال کے آغاز پر اس پالیسی پر فوری عمل درآمد ممکن ہو۔