اسسٹنٹ کمشنر پنڈدادنخان کا مندہار اور ملحقہ دیہات کا دورہ، نکاسی آب کی بحالی کے لیے اقدامات کی ہدایت

پنڈدادنخان: ڈپٹی کمشنر جہلم میر رضا اوزگن کی ہدایات پر اسسٹنٹ کمشنر پنڈدادنخان عائشہ شفقت نے محکمہ آبپاشی کے افسران کے ہمراہ مندہار گاؤں کا دورہ کیا، جہاں قدرتی نکاسی کا راستہ بند ہونے کے باعث تین ملحقہ دیہات میں بارشی پانی کے ٹھہراؤ کی صورتحال کا جائزہ لیا گیا۔

قدرتی نکاسی کا راستہ متاثر ہونے کے باعث بارش کا پانی معمول کے مطابق آگے منتقل نہیں ہو پا رہا، جس کے نتیجے میں مندہار گاؤں اور ملحقہ آبادیوں میں پانی کے ٹھہراؤ کی صورتحال پیدا ہوگئی ہے۔ اسسٹنٹ کمشنر نے متاثرہ علاقوں میں پانی کے اخراج کے لیے کیے گئے انتظامات کا بھی معائنہ کیا۔

اس موقع پر اسسٹنٹ کمشنر عائشہ شفقت نے محکمہ آبپاشی کے افسران کو ہدایت کی کہ پانی کے قدرتی بہاؤ کی بحالی کے لیے ڈسٹری بیوٹری پر مناسب مقام پر پل نما گزرگاہ تعمیر کی جائے تاکہ بارشی پانی کے اخراج میں حائل رکاوٹ دور کی جا سکے۔

انہوں نے متعلقہ حکام کو ہدایت کی کہ ضروری اقدامات ترجیحی بنیادوں پر مکمل کیے جائیں اور کام کی پیش رفت کی مؤثر نگرانی یقینی بنائی جائے۔

اسسٹنٹ کمشنر عائشہ شفقت نے کہا کہ متعلقہ اداروں کی بروقت کارروائی سے متاثرہ دیہات کے مکینوں کو درپیش مشکلات میں کمی لانے کے ساتھ ساتھ مستقبل میں بارشی پانی کے ٹھہراؤ کی صورتحال سے بھی مؤثر طور پر بچاؤ ممکن بنایا جا سکے گا۔