پنڈدادنخان میں رمضان المبارک کا تقدس پامال کرنے والے 3 افراد گرفتار

پنڈدادنخان: ماہِ رمضان المبارک کے تقدس کو برقرار رکھنے کے لیے پنڈدادنخان پولیس نے اہم کارروائی کرتے ہوئے احترامِ رمضان آرڈیننس کی خلاف ورزی پر تین ملزمان کو گرفتار کر لیا۔

تفصیلات کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان اور پولیس ٹیم نے کارروائی کرتے ہوئے رمضان المبارک کے دوران ہوٹل کھول کر سرعام کھانے پینے کا انتظام اور فروخت کرنے والے تین ملزمان کو موقع پر گرفتار کر لیا۔ پولیس کے مطابق ملزمان نے مقدس مہینے کے تقدس کو پامال کرتے ہوئے قانون کی صریح خلاف ورزی کی۔

ملزمان کے خلاف احترامِ رمضان آرڈیننس کے تحت باقاعدہ مقدمہ درج کر کے قانونی کارروائی کا آغاز کر دیا گیا ہے۔ پولیس کا کہنا ہے کہ رمضان المبارک میں مذہبی اقدار اور قانون کی پاسداری ہر شہری پر لازم ہے۔

اس حوالے سے طارق عزیز سندھو نے واضح کیا ہے کہ ماہِ رمضان کے دوران قانون شکنی اور تقدس پامال کرنے والوں کے ساتھ کسی قسم کی رعایت نہیں برتی جائے گی، اور ایسے عناصر کے خلاف بلاامتیاز سخت کارروائیاں جاری رہیں گی تاکہ مقدس مہینے کا احترام ہر صورت یقینی بنایا جا سکے۔