تنخواہ دار طبقے پر لگائے جانے والے ظالمانہ ٹیکسوں کو مسترد کرتے ہیں، احسان الٰہی شاکر

جہلم: ہم حکومت کی جانب سے تنخواہ دار طبقے پر لگائے جانے والے ظالمانہ ٹیکسوں کو مسترد کرتے ہیں اور مطالبہ کرتے ہیں کہ ان ٹیکسوں کو فوری طور پر واپس لیا جائے۔

ان خیالات کا اظہار اگیگا(آل گورنمنٹ گرینڈ الائنس )جہلم کے وائس چیئرمین اور پنجاب ایجوکیٹرزایسوسی ایشن جہلم کے ضلعی صدر احسان الٰہی شاکر اور دیگر ضلعی عہدیداران نے اساتذہ کی نمائندہ تنظیم پنجاب ایجوکیٹرزایسوسی ایشن جہلم کے ایک ہنگامی اجلاس کے بعد میڈیا کے نمائندوں سے بات چیت کرتے ہوئے کیا۔

اجلاس میں احسان الٰہی شاکر(ضلعی صدر)، انزک محمود(چیئرمین)،محمد رفیع (سینئر نائب صدر)، مبشر عباس شاہد(جنرل سیکرٹری)، سعید اختر(جوائنٹ سیکرٹری) شاہد سکندر مرزا(میڈیا سیکرٹری)، وقار کاظمی (نائب صدر) اور غلام مرتضیٰ عثمانی(نائب صدر) شامل تھے۔

عہدیداران کا کہنا تھا کہ گزشتہ 3سالوں میں مہنگائی میں بے پناہ اضافہ ہوا ہے جس کی وجہ سے پاکستانیوں کی ایک بڑی تعداد غربت کی لائن سے نیچے منتقل ہوگئی ہے اور عام آدمی کا گزارا بہت مشکل ہوگیا ہے۔تنخواہ دار طبقہ بھی اس مہنگائی سے بہت زیادہ متاثر ہواہے۔

انہوں نے کہا کہ حالیہ بجٹ میں سرکاری ملازمین پاکستان بھرسے تنخواہوں میں بڑے اضافے کا مطالبہ لے کر پارلیمنٹ ہاؤس اسلام آباد گئے۔حکومت نے اس احتجاجی مظاہرے کی وجہ سے سکیل 1سے سکیل 16کے ملازمین کی تنخواہوں میں 25فیصداور سکیل 17سے سکیل 22تک کے ملازمین کی تنخواہوں میں 22فیصد اضافے کا اعلان کیا۔

انہوں نے کہا کہ دوسری جانب ساتھ ہی ان ملازمین کی تنخواہوں پر ٹیکس کو بہت زیادہ بڑھا دیا جس کی وجہ سے تنخواہوں میں حالیہ اضافہ تقریباً نہ ہونے کے برابر پہنچ گیا ہے کیونکہ جواعداد وشمار سامنے آرہے ہیں ان کے مطابق بڑے سکیل کے ملازمین کی تنخواہوں میں ہونے والا سارا اضافہ ٹیکسوں کی نذر ہوجائے گاجبکہ چھوٹے سکیل کے ملازمین تو بالکل ہی پس کررہ جائیں گے۔

انہوں نے کہا کہ ہمارا یہ مطالبہ ہے کہ ٹیکسوں میں یہ اضافہ فوری واپس لیا جائے ورنہ ہم بھرپور احتجاج کا راستا اختیار کریں گے۔