پنڈدادنخان میں ون ویلنگ کرنے والے 15 لڑکے گرفتار، شرط کی رقم برآمد

پنڈدادنخان میں ون ویلنگ کرنے والے 15 لڑکے گرفتار کر کے شرط کی رقم برآمد کر لی گئی، تین لڑکے فرار ہو گئے۔

تفصیلات کے مطابق جہلم کی تحصیل پنڈدادنخان میں مخبر کی اطلاع کہ مین روڈ پر سروبہ چوک کے قریب 15 سے 20 لڑکوں کی ایک ٹولی ون ویلنگ کر رہی ہے جس پر ایس ایچ او تھانہ للِہ راجہ عثمان تصدق، سب انسپکٹر محمد ریاض اور اے ایس آئی خواجہ حسن رضا نے ٹیم کے ہمراہ کارروائی کرتے ہوئے ون ویلنگ پر شرط لگا کر شور شرابہ کرنے والے 15 لڑکوں کو گرفتار کر لیا جبکہ تین لڑکے فرار ہونے میں کامیاب ہو گئے۔

پولیس نے 17 لڑکوں کے خلاف مقدمہ درج کر کے شرط کے 50 ہزار سے زائد رقم، موبائل فون اور موٹر سائیکلیں برآمد کر لیں۔

سماجی حلقوں نے تھانہ للِہ پولیس کی کارروائی پر خراج پیش کرتے ہوئے کہا کہ ون ویلنگ ایک انتہائی خطرناک عمل ہے جس سے کئی جانوں کا ضیاع ہو چکا ہے۔ بھیلوال سروبہ جیسے علاقے میں ون ویلنگ انتہائی تشویشناک عمل ہے، والدین کو اپنے بچوں کی حرکات پر نظر رکھنی چاہیے۔