ضلع جہلم میں شہریوں کو معیاری تفریحی سہولیات فراہم کرنے کے لیے اقدامات جاری ہے، میثم عباس

جہلم: ضلع جہلم میں شہریوں کو معیاری تفریحی سہولیات فراہم کرنے کے لیے اقدامات جاری، کالا گجراں میں 11 کروڑ روپے کی لاگت سے تعمیر ہونے والے جدید پارک کا کام تیزی سے جاری ہے۔

اس بات کا اظہار ڈپٹی کمشنر جہلم میثم عباس نے جاری ترقیاتی کاموں کا جائزہ لیتے ہوئے کیا۔ ڈی سی جہلم نے کالا گجراں پارک کے تعمیراتی مقام کا دورہ کیا اور وہاں موجود تعمیراتی کمپنی کے افسران کو ہدایت دی کہ منصوبے کی تکمیل میں کسی قسم کی تاخیر نہ ہو اور تعمیر کے ہر مرحلے میں اعلیٰ معیار کو یقینی بنایا جائے۔

انہوں نے کہا کہ یہ منصوبہ شہریوں کے لیے صحت مند تفریح فراہم کرنے کا بہترین ذریعہ ثابت ہو گا۔

بعد ازاں ڈی سی میثم عباس نے شاندار چوک میں واقع میجر اکرم شہید پارک کا بھی دورہ کیا جہاں پارک کی تزئین و آرائش کا کام جاری ہے۔ انہوں نے ہدایت کی کہ میجر اکرم شہید پارک کا کام ایک ہفتے میں مکمل کیا جائے تاکہ شہریوں کو تفریحی سہولت کے لیے مزید انتظار نہ کرنا پڑے۔

ڈپٹی کمشنر نے متعلقہ اداروں کو ہدایت کی کہ مقررہ مدت کے اندر تمام ترقیاتی منصوبے مکمل کیے جائیں تاکہ عوام کو فوری ریلیف اور بہتر سہولیات میسر آ سکیں۔ انہوں نے اس عزم کا اظہار کیا کہ اسی ہفتے پارک کا کام مکمل کر کے شہریوں کے لیے اسے کھول دیا جائے گا۔