ڈی او لٹریسی میمونہ انجم کا الصفہ ریلیف ہیڈ پاکستان شمس الدین کے ہمراہ ٹلہ جوگیاں کے دشوار گزار گاؤں موگلی کا دورہ
دینہ: ڈپٹی کمشنر جہلم میر رضا اوزگن کی ہدایات پر ڈسٹرکٹ آفیسر لٹریسی میمونہ انجم نے الصفہ ریلیف ہیڈ پاکستان شمس الدین کے ہمراہ ٹلہ جوگیاں کے دشوار گزار گاؤں موگلی کا دورہ کیا، جہاں حال ہی میں قائم لٹریسی و نان فارمل سکول کا معائنہ کیا گیا۔
دورے کا مقصد سکول میں تدریسی عمل، بچوں کی حاضری اور دستیاب ہیلتھ کیئر سہولیات کا جائزہ لینا تھا۔ اس موقع پر بچوں کی تعلیمی کارکردگی اور صحت کی سہولیات کو چیک کیا گیا۔
ڈپٹی کمشنر میر رضا اوزگن نے ہدایت کی کہ دور دراز علاقوں کے ہر بچے تک تعلیم اور صحت جیسی بنیادی سہولیات کی فراہمی یقینی بنائی جائے تاکہ وہ بھی ترقی کے یکساں مواقع حاصل کر سکیں۔
الصفہ ریلیف کے نمائندے شمس الدین نے ضلعی انتظامیہ کے اس اقدام کو سراہتے ہوئے مکمل تعاون کی یقین دہانی کروائی اور کہا کہ بچوں کو درسی کتب، اسٹیشنری اور صحت کی سہولیات فراہم کرنے کا سلسلہ جاری رکھا جائے گا۔
اس منصوبے کا مقصد ٹلہ جوگیاں جیسے پسماندہ علاقوں میں تعلیمی سہولیات کی فراہمی کو یقینی بنانا ہے، تاکہ وہاں کے بچوں کو بھی شہری علاقوں کے برابر مواقع میسر آ سکیں۔
ڈسٹرکٹ آفیسر لٹریسی میمونہ انجم نے اس عزم کا اظہار کیا کہ سکول کے معیار کو برقرار رکھنے اور مزید بہتری کے لیے اقدامات تسلسل کے ساتھ جاری رکھے جائیں گے۔
