محکمہ ریونیو سے متعلقہ شکایات کے ازالے کیلئے اجلاس، شہری سہولیات کی بہتری پر زور
جہلم: شہریوں کو محکمہ ریونیو سے متعلقہ خدمات کی فراہمی اور عوامی شکایات کے بروقت ازالے کے لیے ایڈیشنل ڈپٹی کمشنر ریونیو ثانیہ صفی کی زیر صدارت ایک اہم اجلاس ڈپٹی کمشنر آفس جہلم میں منعقد ہوا۔
اجلاس میں محکمہ مال کے افسران نے شرکت کی اور محکمہ کی جانب سے انجام دی جانے والی سرگرمیوں پر تفصیلی بریفنگ دی۔ اجلاس کے دوران افسران نے اراضی کے انتقال، فردات کے اجراء، ریونیو ریکارڈ کی کمپیوٹرائزیشن، اور سرکاری فیسوں کی وصولی سمیت دیگر اہم امور پر روشنی ڈالی۔
ایڈیشنل ڈپٹی کمشنر ریونیو ثانیہ صفی نے اجلاس سے خطاب کرتے ہوئے کہا کہ محکمہ مال میں انتہائی اہم نوعیت کے سرکاری امور انجام دیے جا رہے ہیں جن کا براہ راست تعلق عوامی مفاد سے ہے۔ "شہریوں کی شکایات کا بروقت ازالہ، غیر ضروری اعتراضات کا خاتمہ، اور دفاتر میں افسران کی بروقت موجودگی یقینی بنانا ضروری ہے تاکہ عوام کو سہولت میسر آ سکے۔”
انہوں نے واضح کیا کہ اگر کسی شہری کو محکمہ مال سے متعلق شکایات یا مسائل درپیش ہوں تو وہ بلاجھجھک متعلقہ تحصیلدار، اسسٹنٹ کمشنر یا ایڈیشنل ڈپٹی کمشنر ریونیو سے براہ راست رابطہ کر سکتے ہیں۔
اجلاس کے اختتام پر تمام افسران کو ہدایت دی گئی کہ وہ اپنی ذمہ داریوں کو احسن طریقے سے ادا کریں اور عوامی خدمت کو اولین ترجیح دیں۔
