پنڈدادنخان / جہلم: صوبائی وزیر مواصلات پنجاب ملک صہیب احمد بھرتھ نے ضلع جہلم، بالخصوص تحصیل پنڈدادنخان کا دورہ کیا جہاں انہوں نے محرم الحرام کے انتظامات، ترقیاتی منصوبوں اور عوامی سہولیات کا تفصیلی جائزہ لیا۔
دورے کے دوران انہوں نے محرم الحرام کے جلوسوں اور مجالس کے روٹس کا معائنہ کیا، تحصیل ہیڈکوارٹر ہسپتال کا دورہ کیا، زیر تعمیر للِہ تا جہلم دو رویہ سڑک کے منصوبے کا جائزہ لیا اور پنڈدادنخان کے لیے گرین لائن بس سروس سمیت متعدد ترقیاتی منصوبوں کا اعلان بھی کیا۔
دورے کے موقع پر ڈپٹی کمشنر جہلم میر رضا اوزگن، ڈسٹرکٹ پولیس آفیسر شفیق احمد چوہدری، اسسٹنٹ کمشنر پنڈدادنخان عائشہ شفقت اور دیگر متعلقہ افسران بھی ان کے ہمراہ موجود تھے۔ انتظامی افسران نے نقشوں اور بریفنگ کے ذریعے صوبائی وزیر کو تحصیل بھر میں محرم الحرام کے جلوسوں، مجالس اور سیکیورٹی انتظامات کے حوالے سے تفصیلی آگاہ کیا۔
صوبائی وزیر نے تحصیل ہیڈکوارٹر ہسپتال پنڈدادنخان کا بھی دورہ کیا اور مریضوں و ان کے لواحقین سے ملاقات کر کے طبی سہولیات، ادویات کی دستیابی اور علاج معالجے کے معیار کے بارے میں معلومات حاصل کیں۔ انہوں نے ہسپتال انتظامیہ کو ہدایت کی کہ عوام کو معیاری طبی سہولیات کی فراہمی ہر صورت یقینی بنائی جائے۔
بعد ازاں صوبائی وزیر نے للِہ تا جہلم دو رویہ سڑک منصوبے کا معائنہ کیا اور اس منصوبے کی جلد تکمیل کی نوید سنائی۔ میڈیا سے گفتگو کرتے ہوئے ملک صہیب احمد بھرتھ نے اعلان کیا کہ پنڈدادنخان کے عوام کو جلد گرین لائن بس سروس کی سہولت فراہم کی جائے گی تاکہ شہریوں کو معیاری اور آرام دہ سفری سہولیات میسر آ سکیں۔
انہوں نے مزید بتایا کہ تین اضلاع کے سنگم پر واقع دریائے جہلم پر نئے پل کی تعمیر کے لیے فزیبلٹی رپورٹ مکمل کر کے پیش کر دی گئی ہے، جس پر جلد عملی پیش رفت متوقع ہے۔ ان کا کہنا تھا کہ وزیراعلیٰ پنجاب مریم نواز شریف کی قیادت میں مسلم لیگ (ن) کی حکومت عوام کو جدید سفری اور بنیادی سہولیات فراہم کرنے کے لیے عملی اقدامات کر رہی ہے اور جلد ہی علاقہ مکین ان منصوبوں کے ثمرات سے مستفید ہوں گے۔
قبل ازیں صوبائی وزیر ملک صہیب احمد بھرتھ نے محرم الحرام کے حوالے سے امن کمیٹی کے ارکان سے ایک اہم اجلاس کی صدارت بھی کی۔ اجلاس میں ڈی پی او جہلم شفیق احمد چوہدری، ڈپٹی کمشنر میر رضا اوزگن، ضلعی انتظامیہ، پولیس حکام اور امن کمیٹی کے ممبران نے شرکت کی۔
اجلاس کے دوران محرم الحرام کے جلوسوں اور مجالس کے پرامن انعقاد، بین المسالک ہم آہنگی، سیکیورٹی انتظامات اور شہری سہولیات کے حوالے سے تفصیلی تبادلہ خیال کیا گیا۔ صوبائی وزیر نے کہا کہ محرم الحرام کے دوران امن و امان کا قیام حکومت پنجاب کی اولین ترجیح ہے اور تمام متعلقہ ادارے باہمی رابطے اور مؤثر حکمت عملی کے تحت اپنی ذمہ داریاں ادا کر رہے ہیں۔
اس موقع پر ڈی پی او جہلم شفیق احمد چوہدری نے ضلع بھر میں کیے گئے سیکیورٹی انتظامات، سیف سٹی کیمروں کے ذریعے نگرانی، سرچ اینڈ سویپ آپریشنز اور حساس مقامات کی سیکیورٹی کے حوالے سے بریفنگ دی، جبکہ ڈپٹی کمشنر میر رضا اوزگن نے صفائی ستھرائی، روشنی اور دیگر انتظامی سہولیات کے بارے میں آگاہ کیا۔
صوبائی وزیر نے ہدایت کی کہ وزیراعلیٰ پنجاب کے ویژن کے مطابق محرم الحرام کے دوران راولپنڈی ڈویژن کے تمام اضلاع میں جلوسوں اور مجالس کے شرکاء کو بہترین سہولیات فراہم کی جائیں اور امن و امان کے قیام کے لیے تمام وسائل بروئے کار لائے جائیں۔ انہوں نے اس عزم کا اظہار کیا کہ حکومت پنجاب محرم الحرام کے دوران مذہبی ہم آہنگی، بھائی چارے اور پرامن ماحول کے فروغ کے لیے ہر ممکن اقدامات جاری رکھے گی۔
-
-
-
-
