میونسپل کمیٹی سوہاوہ کی نااہلی اور غیر ذمہ داری کا ایک اور واقعہ، بکڑالہ واٹر سپلائی سے دو ٹرانسفارمرچوری
سوہاوہ: میونسپل کمیٹی سوہاوہ کی ناقص حکمت عملی اور اہلکاروں کی غفلت کے باعث واٹر سپلائی سکیم سے قیمتی اثاثے مسلسل چوری ہو رہے ہیں۔ تازہ ترین واقعے میں بکڑالہ واٹر سپلائی سکیم سے ایک ہی رات میں دو ٹرانسفارمر چوری کر لیے گئے جبکہ چند ہفتے قبل ڈوہنگی واٹر سپلائی سکیم سے بھی تالے توڑ کر قیمتی تاریں، سٹارٹرز اور دیگر سامان چوری ہو چکا ہے۔
جہلم کی تحصیل سوہاوہ کے علاقہ بکڑالہ کے واٹر سپلائی سکیم پر ایک چوکیدار رات کی ڈیوٹی پر موجود ہوتا ہے، لیکن اس کے باوجود چوروں نے قیمتی ٹرانسفارمرز سے کوائلز اور آئل نکال کر کور موقع پر چھوڑ دیا۔ یہ واقعہ نہ صرف چوکیدار کی کارکردگی بلکہ میونسپل کمیٹی کے افسران اور اہلکاروں کی نااہلی کو بھی بے نقاب کرتا ہے۔
چند ماہ قبل بکڑالہ واٹر سپلائی سکیم کی ایک ٹرانسفارمر کو لاکھوں روپے کی لاگت سے مرمت کروایا گیا تھا، لیکن انتظامیہ کی غفلت کے باعث یہ اثاثہ بھی چوروں کے ہاتھ لگ گیا۔ مزید یہ کہ خراب ٹرانسفارمر اور موٹریں، جو مرمت کے لیے بھیجی گئی تھیں، تاحال واپس نہیں آ سکیں۔ ایک 100 ہارس پاور کی موٹر جس کی قیمت نوے لاکھ روپے سے زائد ہے، مرمت کے بعد واپس نہ آنا انتظامیہ کی لاپرواہی کا منہ بولتا ثبوت ہے۔
میڈیا رپورٹس میں بارہا میونسپل کمیٹی کے افسران اور عملے کی نااہلی کی نشاندہی کی گئی، لیکن اس پر نہ تو ضلعی ایڈمنسٹریٹر نے کارروائی کی اور نہ تحصیل انتظامیہ نے کوئی ایکشن لیا۔ شہریوں کا کہنا ہے کہ واٹر سپلائی سکیمز کی دیکھ بھال اور حفاظت پر مکمل نظر رکھنے کے بجائے اہلکار اپنی ذمہ داریوں سے غفلت برت رہے ہیں۔
سوہاوہ کے شہری پہلے ہی پانی کی قلت کا شکار ہیں اور اب میونسپل کمیٹی کی سنگین کوتاہیوں نے ان کی مشکلات میں مزید اضافہ کر دیا ہے۔ شہریوں نے ڈپٹی کمشنر جہلم اور اسسٹنٹ کمشنر سوہاوہ سے مطالبہ کیا ہے کہ ان واقعات کی غیر جانبدارانہ تحقیقات کی جائیں اور ذمہ دار اہلکاروں کے خلاف سخت محکمانہ کارروائی کی جائے۔
