جشن عید میلاد النبی ﷺ کے حوالے سے اسسٹنٹ کمشنر دینہ کے دفتر میں ایک اہم اجلاس
دینہ: جشن عید میلاد النبی ﷺ کے حوالے سے اسسٹنٹ کمشنر دینہ کے دفتر میں ایک اہم اجلاس منعقد کیا گیا، جس میں تاجر برادری سمیت شہریوں کی کثیر تعداد نے شرکت کی۔
اجلاس کی صدارت اسسٹنٹ کمشنر صفاء عابد نے کی جبکہ میٹنگ میں شہر کے معروف سماجی شخصیات اور بلدیاتی نمائندگان بھی شریک ہوئے۔
اجلاس سے خطاب کرتے ہوئے اسسٹنٹ کمشنر صفاء عابد نے کہا کہ ربیع الاول کا مہینہ باعث مسرت اور رحمتوں و برکتوں کا مہینہ ہے، جو محبت، بھائی چارے اور اخوت کا درس دیتا ہے۔ انہوں نے کہا کہ اس بابرکت مہینے میں شہری شہر کو جھنڈیوں اور لائٹنگ کے ذریعے خوبصورت بنانے کا اہتمام کریں، انتظامیہ اس سلسلے میں بھرپور تعاون فراہم کرے گی۔
انہوں نے مزید کہا کہ ربیع الاول وہ مہینہ ہے جس میں آقا ﷺ کی ولادت باسعادت کے ذریعے اللہ پاک نے تمام عالمین پر رحمت نازل فرمائی، اس ماہ کو مسلکی و لسانی تفریق سے بالا تر ہو کر عقیدت و احترام کے ساتھ منایا جانا چاہیے۔
میٹنگ میں سابق چیئرمین بلدیہ دینہ شیخ اکرام الٰہی، انجمن آڑھتیاں کے صدر چوہدری محبوب احمد، چوہدری ابرار، چوہدری فیاض، شیخ ندیم منظور، ملک ندیم، میاں زرار اور لالہ ایوب سمیت دیگر شخصیات نے شرکت کی۔ اس موقع پر چیف آفیسر میونسپل کمیٹی دینہ محمد فیصل اور تحصیلدار دینہ شمشیر حیدر رانجھا بھی موجود تھے۔
اجلاس میں فیصلہ کیا گیا کہ تاجر برادری اور شہری مل کر شہر کو عید میلاد النبی ﷺ کے موقع پر خوبصورت بنائیں گے تاکہ دینہ کو روشنیوں اور رنگوں سے سجایا جا سکے اور اس بابرکت مہینے کی مناسبت سے حقیقی خوشی کا اظہار کیا جا سکے۔
