جہلم پولیس عوام کے جان و مال کے تحفظ کیلئے متحرک، برساتی پانی میں پھنسے بچوں کو ریسکیو کیا

پنڈدادنخان: وزیر اعلیٰ پنجاب مریم نواز شریف اور آئی جی پنجاب کے واضح احکامات کی روشنی میں پنجاب پولیس عوام کے جان و مال کے تحفظ کے لیے ہر لمحہ متحرک ہے۔ ڈی پی او جہلم کی زیر نگرانی ضلع بھر میں پولیس نہ صرف جرائم کے خاتمے بلکہ عوامی ریلیف کے لیے بھی سرگرم عمل ہے۔

جہلم کی تحصیل پنڈدادنخان کے نواحی گاؤں کندوال میں شدید بارش کے باعث برساتی پانی نشیبی علاقوں میں داخل ہوگیا، جس سے گاؤں کے مکینوں کو شدید خطرات لاحق ہوگئے۔ اس صورتحال میں ڈی ایس پی پنڈدادن خان ملک محمد اکرم فوری طور پر موقع پر پہنچے اور پولیس اہلکاروں کے ہمراہ امدادی کارروائیاں شروع کر دیں۔

ڈی ایس پی محمد اکرم نے خود بھی عملی طور پر بند کی تعمیر میں حصہ لیا اور پولیس فورس کے ساتھ مل کر برساتی پانی میں پھنسے ہوئے بچوں کو محفوظ مقام پر منتقل کیا۔ ان کے اس اقدام پر اہل علاقہ نے زبردست خراج تحسین پیش کیا اور کہا کہ پولیس فورس عوام کے ساتھ ہر مشکل وقت میں کھڑی ہے۔

عوامی و سماجی حلقوں نے حکومتِ پنجاب اور پولیس انتظامیہ کے ان بروقت اقدامات کو سراہتے ہوئے کہا ہے کہ اس طرح کے عملی اقدامات سے عوام کا اعتماد پولیس پر مزید مضبوط ہو رہا ہے۔ انہوں نے توقع ظاہر کی کہ مستقبل میں بھی اسی جذبے کے ساتھ عوامی خدمت کا سلسلہ جاری رہے گا۔