معیاری تعلیم کے فروغ کیلئے اساتذہ کا کردار قابلِ تحسین ہے، مشیر صحت ڈاکٹر اظہر محمود کیانی
سوہاوہ: گورنمنٹ کیپٹن حسنات ہائی سکول سوہاوہ میں ایک پروقار تقریب کا انعقاد کیا گیا، جس میں مشیر وزیراعلیٰ پنجاب برائے صحت میجر جنرل (ر) ڈاکٹر اظہر محمود کیانی نے بطور مہمانِ خصوصی شرکت کی۔
تقریب کا مقصد تحصیل سوہاوہ کے اُن اساتذہ کی حوصلہ افزائی کرنا تھا جنہوں نے اپنے اپنے مضامین میں سو فیصد نتائج دے کر نمایاں کامیابی حاصل کی۔
تقریب کے دوران مشیر صحت پنجاب میجر جنرل (ر) ڈاکٹر اظہر محمود کیانی نے کامیاب اساتذہ میں تعریفی سرٹیفکیٹس تقسیم کیے اور ان کی تعلیمی خدمات کو خراجِ تحسین پیش کیا۔
انہوں نے اساتذہ کی محنت، لگن اور پیشہ ورانہ صلاحیتوں کو سراہتے ہوئے کہا کہ بہترین نتائج دراصل اساتذہ کی انتھک محنت اور طلبہ کی بہترین رہنمائی کا ثمر ہوتے ہیں۔
اس موقع پر اسسٹنٹ کمشنر سوہاوہ غزالہ اصغر، ڈسٹرکٹ ایجوکیشن آفیسر سیکنڈری محمد شہزاد، ایڈووکیٹ راجہ غلام حسین کیانی سمیت علاقہ کے معززین، اساتذہ اور طلبہ کی بڑی تعداد بھی موجود تھی۔
شرکاء نے نمایاں کارکردگی کا مظاہرہ کرنے والے اساتذہ کو بھرپور خراجِ تحسین پیش کیا جبکہ تقریب سے خطاب کرتے ہوئے مشیر صحت پنجاب نے کہا کہ اساتذہ قوم کے حقیقی معمار ہیں اور نئی نسل کی تعلیم و تربیت میں ان کا کردار انتہائی اہمیت کا حامل ہے۔
تقریب کے اختتام پر شرکاء نے ڈاکٹر اظہر محمود کیانی کی تعلیمی شعبے کیلئے خدمات کو سراہا اور معیاری تعلیم کے فروغ کیلئے اپنے عزم کا اظہار کیا۔
