تیسرا جشنِ بہاراں فٹ بال ٹورنامنٹ شاندار انداز میں اختتام پذیر، الفتح فٹ بال کلب فاتح

جہلم میں کھیلوں کی دنیا کا ایک دلچسپ اور جوش و خروش سے بھرپور ایونٹ تیسرا جشنِ بہاراں فٹ بال ٹورنامنٹ شاندار انداز میں اختتام پذیر ہوگیا۔

فائنل میں الفتح فٹ بال کلب نے عمدہ کھیل پیش کرتے ہوئے ایک گول کی برتری سے ٹائٹل اپنے نام کر لیا۔ جیت کے بعد کھلاڑیوں اور نوجوانوں میں خوشی دیدنی تھی اور گراؤنڈ نعروں اور تالیوں سے گونج اٹھا۔

بلال ٹاؤن گراؤنڈ میں منعقدہ اس رنگا رنگ ٹورنامنٹ میں 16 ٹیموں نے بھرپور جوش و خروش کے ساتھ حصہ لیا۔ تقریب کے مہمانِ خصوصی، جہلم کے معروف سینئر صحافی چوہدری مہربان حسین نے فائنل میچ سے پہلے دونوں ٹیموں کا تعارف کروایا اور نوجوان فٹ بالر‌ز کی حوصلہ افزائی کی۔

سنسنی خیز مقابلے کے دوران الفتح فٹ بال کلب نے اپنی بہترین کارکردگی کا مظاہرہ کرتے ہوئے ایک گول کی سبقت برقرار رکھی اور فتح اپنے نام کی۔

ٹورنامنٹ کے اختتام پر چوہدری مہربان حسین نے پہلی، دوسری اور تیسری پوزیشن حاصل کرنے والی ٹیموں میں انعامات تقسیم کیے۔ اس موقع پر انہوں نے نوجوانوں کو کھیلوں کی طرف راغب کرنے کی ضرورت پر زور دیتے ہوئے کہا کہ "جس شہر کے گراؤنڈ آباد ہوتے ہیں، وہاں کے اسپتال ویران ہو جاتے ہیں”۔