پیکا ایکٹ ترمیمی بل کے خلاف جہلم پریس کلب کے صحافیوں کا بھرپور احتجاج
جہلم پریس کلب کے صحافیوں نے کچہری چوک سے جہلم پریس کلب تک احتجاجی ریلی نکالی اور پیکا ایکٹ ترمیمی بل کے خلاف شدید احتجاج کیا۔
تفصیلات کے مطابق جہلم پریس کلب کی کال پر صحافی برادری نے ملک بھر کی طرح جہلم پریس کلب کے باہر بھی احتجاجی مظاہرہ کیا۔ صحافی رہنماؤں نے پیکا ایکٹ کو مسترد کرتے ہوئے اسے آزادی صحافت پر حملہ قرار دیا۔ صحافیوں کے ہاتھوں میں بینرز اور پلے کارڈز تھے جن پر نعرے درج تھے اور اس موقع پر صحافیوں نے شدید نعرے بازی بھی کی۔
صحافیوں کا کہنا تھا کہ یہ بل آزادی صحافت پر ایک حملہ ہے۔ جنرل سیکرٹری جہلم پریس کلب الیاس صادق وٹو نے خطاب کرتے ہوئے کہا کہ حکومت نے صحافیوں کی زبان بندی کے لیے پیکا ایکٹ کی منظوری دی ہے جو کہ ظلم اور صحافیوں کی آزادی کے خلاف ہے۔
اس موقع پر جہلم پریس کلب، الیکٹرانک میڈیا، ڈیجیٹل میڈیا، پرنٹ میڈیا، میڈیا ون اور ڈسٹرکٹ یونین آف جرنلسٹس کے صحافیوں سمیت سول سوسائٹی اور وکلاء کی بڑی تعداد نے بھی احتجاج میں شرکت کی۔
