اسسٹنٹ کمشنر سوہاوہ کا شہر کے مختلف پیٹرول پمپس کا دورہ، وزیراعظم فیول ریلیف اسکیم کے تحت رعایتی پیٹرول کی فراہمی کا جائزہ لیا

سوہاوہ: وزیراعظم فیول ریلیف اسکیم کے تحت شہریوں کو رعایتی پیٹرول کی شفاف اور بلاتعطل فراہمی یقینی بنانے کے لیے اسسٹنٹ کمشنر سوہاوہ غزالہ اصغر نے سوہاوہ شہر کے مختلف پیٹرول پمپس کا دورہ کیا۔ اس موقع پر انہوں نے رعایتی پیٹرول کی فراہمی، متعلقہ ریکارڈ اور شہریوں کو فراہم کی جانے والی سہولیات کا جائزہ لیا۔

دورے کے دوران اسسٹنٹ کمشنر نے پیٹرول پمپس پر رعایتی پیٹرول کی فراہمی سے متعلق ریکارڈ کی جانچ پڑتال کی اور شہریوں سے براہِ راست گفتگو کرکے وزیراعظم فیول ریلیف اسکیم کے تحت فراہم کی جانے والی سہولت کے بارے میں ان کی رائے بھی معلوم کی۔ شہریوں نے رعایتی پیٹرول کی فراہمی اور مجموعی انتظامات پر اطمینان کا اظہار کیا۔

اس موقع پر اسسٹنٹ کمشنر غزالہ اصغر نے پیٹرول پمپ انتظامیہ کو ہدایت کی کہ رعایتی پیٹرول کی فراہمی سے متعلق مکمل ریکارڈ باقاعدگی سے مرتب اور محفوظ رکھا جائے، جبکہ اہل شہریوں کو حکومتی ریلیف کی شفاف، بروقت اور بلا تعطل فراہمی ہر صورت یقینی بنائی جائے۔

انہوں نے کہا کہ وزیراعظم فیول ریلیف اسکیم کے تحت شہریوں کو فراہم کی جانے والی سہولت میں کسی قسم کی غفلت یا تاخیر برداشت نہیں کی جائے گی اور اسکیم پر عملدرآمد کے دوران شفافیت اور شہریوں کو بہتر سہولیات کی فراہمی کو یقینی بنایا جائے۔