ضلع جہلم میں طوفانی بارش اور ژالہ باری، موسم خوشگوار، تیار فصلوں کو نقصان کا خدشہ
ضلع جہلم میں طوفانی بارش اور ژالہ باری سے موسم خوشگوار ہو گیا، ژالہ باری سے گندم کی تیار فصل کو نقصان پہنچنے کا خدشہ ظاہر کیا جا رہا ہے۔
تفصیلات کے مطابق ضلع جہلم میں طوفانی بارش کے باعث موسم خوشگوار ہو گیا جبکہ درجہ حرارت میں نمایاں کمی دیکھنے میں آئی۔ ضلع کی چاروں تحصیلوں دینہ، جہلم، پنڈدادنخان اور سوہاوہ میں وقفے وقفے سے بارش کا سلسلہ جاری رہا۔
سوہاوہ کے نواحی علاقوں ڈومیلی، مغل آباد اور فتح پور میں شدید ژالہ باری بھی ریکارڈ کی گئی، جس کے باعث زمین نے سفید چادر اوڑھ لی اور سردی کا احساس بڑھ گیا۔ اسی طرح گزشتہ رات پنڈدادنخان کے علاقے ٹوبھہ میں بھی شدید ژالہ باری ہوئی۔
ژالہ باری کے باعث گندم کی تیار فصل کو نقصان پہنچنے کا خدشہ ظاہر کیا جا رہا ہے، جس پر زمینداروں میں تشویش کی لہر دوڑ گئی ہے۔
دوسری جانب پنڈدادنخان اور گردونواح میں بادلوں کے ڈیرے رہنے سے موسم مزید خوشگوار ہو گیا ہے اور شہریوں نے گرمی سے عارضی نجات پر اطمینان کا اظہار کیا ہے۔
محکمہ موسمیات نے آئندہ دنوں میں مزید بارش اور ژالہ باری کی پیشگوئی کی ہے، جس کے پیش نظر کسانوں کو احتیاطی تدابیر اختیار کرنے کی ہدایت کی گئی ہے۔
