جہلم میں غیر قانونی پتنگ بازی کے خلاف پولیس کا کریک ڈاؤن مزید تیز، 6 ملزمان گرفتار

جہلم : غیر قانونی پتنگ بازی کے خلاف پولیس کا کریک ڈاؤن کرتے ہوئے 6 ملزمان کو گرفتار کر لیا۔

تفصیلات کے مطابق جہلم پولیس کی جانب سے غیر قانونی پتنگ بازی کے خلاف کارروائیاں مزید تیز کر دی گئی ہیں۔ اسی سلسلے میں تھانہ سٹی پولیس نے جدید ٹیکنالوجی اور ڈرون کیمروں کی مدد سے اپنے علاقوں کی مانیٹرنگ کے دوران کارروائی کرتے ہوئے 4 پتنگ بازی کرنے والے ملزمان کو گرفتار کر لیا۔

ایک اور کارروائی میں جہلم پولیس نے جدید ٹیکنالوجی اور ڈرون کیمروں کے ذریعے مختلف علاقوں کی مانیٹرنگ کے دوران تھانہ کالا گجراں کے علاقہ میں پتنگ بازی میں ملوث 2 مزید ملزمان کو گرفتار کر لیا۔

پولیس حکام کے مطابق یہ نگرانی اور کارروائیاں بلا تعطل جاری ہیں تاکہ شہریوں کی جان و مال کا تحفظ یقینی بنایا جا سکے۔ پولیس کی خصوصی ٹیمیں مسلسل چھتوں اور حساس مقامات پر نگرانی کر رہی ہیں تاکہ اس خونی کھیل کا مکمل خاتمہ یقینی بنایا جا سکے۔

اس حوالے سے ڈسٹرکٹ پولیس آفیسر جہلم طارق عزیز سندھو نے کہا کہ پتنگ بازی ایک خطرناک اور جان لیوا کھیل ہے جس کے باعث ماضی میں قیمتی انسانی جانیں ضائع ہو چکی ہیں۔ انہوں نے شہریوں پر زور دیا کہ وہ ذمہ داری کا مظاہرہ کریں، اس غیر قانونی سرگرمی سے مکمل اجتناب کریں اور اپنے بچوں کو بھی اس خونی کھیل سے دور رکھیں۔

ڈی پی او جہلم نے شہریوں سے اپیل کی کہ پتنگ بازی کی روک تھام میں پولیس کا بھرپور ساتھ دیں اور کسی بھی خلاف ورزی کی صورت میں فوری طور پر اطلاع دیں تاکہ بروقت قانونی کارروائی عمل میں لائی جا سکے۔

یاد رہے کہ گزشتہ 10 دنوں کے دوران جہلم پولیس نے پتنگ بازی اور پتنگ فروشی کے خلاف بھرپور اور مؤثر کریک ڈاؤن کرتے ہوئے مجموعی طور پر 28 مقدمات درج کیے اور 29 ملزمان کو گرفتار کیا۔ ان کارروائیوں کے دوران پولیس نے 1064 پتنگیں اور 44 خونی ڈوریں برآمد کر کے تحویل میں لے لی ہیں۔ پولیس حکام کے مطابق یہ سلسلہ آئندہ بھی اسی سختی سے جاری رہے گا۔